Taý týrızmi tabysqa bastaıdy

«Týrızmdi, ásirese ekotýrızm men etnotýrızmdi damytýǵa ekonomıkanyń mańyzdy salasy retinde basa mán berý qajet.

Altyn Ordanyń 750 jyldyǵyn tól tarıhymyzǵa, mádenıetimiz ben tabıǵatymyzǵa týrıster nazaryn aýdarý turǵysynan atap ótken jón.

Týrızmdi damytý úshin qajetti ınfraqurylym júrgizýdi, sonyń ishinde jol salyp, bilikti mamandar daıyndaýdy qamtamasyz etý qajet». Memleket basshysy Qasym-Jomart Toqaev «Syndarly qoǵamdyq dıalog-Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda osylaı degen bolatyn.

Búginde Jambyl oblysynda týrızm salasyn damytý maqsatynda Jýaly aýdanynyń aýmaǵynan «Qaralma» taý-shańǵy bazasynyń qurylysy qarqyndy júrgizilýde. Aıta keterligi, keshen orny tańdalǵanda qys aılarynda qardyń jetkilikti bolýy eskerilgen. Sonymen qatar, nysannyń aýmaǵynda barlyq maýsymdyq kýrorttyq júktemeni qamtamasyz etetin jazǵy demalys túrlerin uıymdastyrýǵa da bolady.

Búgingi tańda aýmaǵy 274 gektar jer telimin quraıtyn keshendegi qurylys jumystary qarqyndy. Onda elektr qýatymen jabdyqtaý, gazdandyrý men sý qubyryn júrgizý jumystary júrgizilip qoıǵan. Jalpy tehnıkalyq sıpattamalary boıynsha arqan joldyń uzyndyǵy 2050 metrdi, al jaıaý júrýge arnalǵan joldyń uzyndyǵy 300 metrdi quraıdy eken. Bul aýmaqta aldaǵy ýaqytta 20 kottedj, 100 oryndyq qonaq úı, 70 oryndyq 2 meıramhana, 30 oryndy kafe, baqylaý alańy, servıs ortalyq, velojoly bar sport mektebi, 100 avtokólikke arnalǵan 2 avtoturaq, basseın jáne basqa da saýda jáne oıyn-saýyq oryndary demalýshylarǵa óz qyzmetin usynbaq.

– «Qaralma» taý-shańǵy bazasy» týrıstik aımaǵynyń negizgi ınvestorlary «Altaıs» JShS men «TarazStroı-2004» JShS bolyp tabylady. Reseılik «Snoýlıft» JShQ kompanııasy men qazaqstandyq «RS Building» JShS kompanııasy arqan joldyń jobalyq-smetalyq qujattamasyn ázirleý úshin jobalaý uıymdary arqyly anyqtalǵan. Arqan joldyń jabdyqtarymen qamtý úshin áleýetti jetkizýshi retinde Ekaterınbýrg qalasyndaǵy «Snoýprom» JShQ kompanııasy tańdaldy. Búgingi kúnge jabdyqtardyń jetkizilýi tolyǵymen iske asyryldy. Arqan joldyń tirekterin montajdaý úshin ankerlerimen birge irgetastary daıyndaldy. Almatylyq «Antal Group» kompanııasy «Qaralma» taý-shańǵy bazasy» týrıstik aımaǵynyń restoran, kafe, servıstik ortalyq, súzgi óristeri men qýat kózimen jabdyqtaý júıeleriniń qurylysy, gaz jáne sýmen jabdyqtalýy boıynsha barlyq jobalaý jumystary tolyǵymen aıaqtalǵan. Shymkenttik «City Engineering» JShS tómengi alańǵa baılanysty kottedjderdi, ishki ınjenerlik jelilerdi jobalaýmen aınalysýda, – degen oblystyq týrızm basqarmasynyń bas mamany Saltanat Týlekova atalǵan jobany iske asyrýdyń arqasynda ishki jáne kirý týrızminiń týrıstik aǵyndarynyń ósýi orta eseppen 45 myń adamǵa jetedi dep kútilip jatqanyn jetkizdi. Sondaı-aq keshen qurylysy iske qosylǵan kezde týrızmniń jalpy qosylǵan quny 43,2 paıyzǵa, tıisinshe oblystyń jalpy óńirlik ónimdegi týrızmniń úlesi 0,4 paıyzǵa ósip, 1,3 paıyzdy quraıdy eken.

Naqtyraq aıtqanda, qazirgi tańda munda «Aııa-Servıs» 7 shaqyrymdyq avtojoldyń qurylysyn aıaqtapty. Sonymen qatar asfalt tóseý jumystaryn júrgizý úshin uzyndyǵy 2,68 shaqyrym bolatyn kireberis joly keńeıtilip, «Altaıs» kompanııasy tarapynan uzyndyǵy 7 shaqyrymdy quraıtyn avtojoldyń jaryqtandyrylǵan. Gaz jáne sýmen qamtamasyz etý máseleleri tolyqtaı sheshilip, nysandy aýyz sýmen qamtamasyz etý úshin uńǵyma burǵylanypty. Oryndyqty arqan jolǵa qajetti 19 tirektiń barlyǵy derlik quıylyp, joǵarǵy jáne tómengi arqan joldyń stansııasy, sondaı-aq qyzmet kórsetý ortalyǵy men tehnıkalyq bokstyń qurylysy qarqyndy júrgizilip jatyr. Budan ózge týrıstik zonanyń tómengi alańshasynda jobaǵa tartylǵan 20 ınvestorlarmen josparlanǵan 20 kottedjdiń qurylysy da qyzý júrgizilýde.