"EvroHım" damý jolynda

Elbasy aıqyndap bergen ındýstrııalandyrý saıasaty Áýlıeata óńirin hımııa ónerkásibi myqtap damyǵan aımaqtardyń birine aınaldyrǵany sózsiz. Oblysta osy sala boıynsha ilkimdi ister jasalynyp, óńir ekonomıkasynyń ilgerileýine ózindik septigin tıgizip keledi. Máselen, sońǵy jyldary kenshiler qalasy Jańatasta táýelsizdiktiń eleń-alańynda turalap qalǵan óndiris oshaqtaryna jan bitip, qaıta jańǵyra bastady. Salaǵa serpin ákelgen «EvroHım» mıneraldyq-hımııalyq kompanııasynyń búginde jumysy júıelenip, zaýyt óndiristik qýattylyǵyn arttyrý úshin jańa jobalardy qolǵa ala bastaǵan.

Jalpy, 2010 jyldyń mamyr aıynda QR Úkimeti Kókjon jáne Gımmalfarbs fosfor ken oryndaryn ıgerý boıynsha konkýrs ótkizgen. Osy oraıda, elimiz úshin «EvroHım tyńaıtqyshtary» kompanııasy strategııalyq mańyzdy jobalaryn usynyp, kenshiler qalasynda jumysyn bastap ketken edi. Negizinen, atalǵan kompanııa jobasynyń damýy tutastaı alǵanda óńirdiń órkendeýine, sondaı-aq aýyl sharýashylyǵyn sapaly tyńaıtqyshtarmen qamtamasyz etip, saladaǵy ónimdiliktiń artýyna jaǵdaı jasamaq.

2012 jyly QR Úkimeti men «EvroHım» arasynda «Qazaqstan Respýblıkasyndaǵy mıneraldy tyńaıtqyshtar óndirisi jáne Qarataý fosfat basseınin ıgerý boıynsha zaýyt qurylysy» ınvestısııalyq jobasyn iske asyrý týraly tarıhı kelisimge qol qoıylyp, ken óndirýdegi jumystaryn bastap ketken-tin.

– 2013 jyly Túrkistan jáne Jambyl oblystaryndaǵy eki fosfat kenin ıgerýdi bastadyq. Ken ornynda óndiris 2014 jyldyń basynan bastap júzege asyrylýda. Qazirgi ýaqytta Qytaı jáne Ortalyq Azııa naryǵyndaǵy kalıı sýlfaty men kúrdeli tyńaıtqyshtardy óndiretin kásiporyn qurý josparlanyp otyr. Búginde kompanııa kalsıı hlorıdi, kalsıı sýlfaty jáne kúkirt qyshqylynyń qajettilikteri úshin dıkalsıı fosfatyn óndiredi. Bizdiń óndiristik aktıvter Reseıde, Lıtvııada, Belgııada, Qytaıda, Brazılııada ornalasqan. 25 eldegi satý keńseleri 100-den astam elderdiń klıentterine qyzmet kórsetedi. О́zderiniń teńiz termınaldary men vagon parki logıstıkalyq shyǵyndardy azaıtýǵa múmkindik beredi. Sonymen qatar kompanııa azot pen fosfat tyńaıtqyshtaryn shyǵaryp, kalıı ken oryndaryn ıgerýdi bastady. Kompanııanyń barlyq ónimderi standartty, ıaǵnı jalpy maqsattaǵy tyńaıtqyshtar jáne uzaq ýaqyt qoldanylatyn tyńaıtqyshtar mamandandyrylǵan tyńaıtqyshtar, – deıdi kompanııa basshysynyń ishki jáne syrtqy baılanys jónindegi keńesshisi Elmıra Kúzen.