Ashyqtyq prınsıpiniń alǵysharttary aıqyndalýda

Memleket basshysy Qasym-Jomart Toqaev «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Joldaýynda sybaılas jemqorlyqqa qarsy kúrestiń kúsheıe túsetindigin aıtqan bolatyn. Osy oraıda Jambyl oblysynda ashyqtyq prınsıpterine negizdelgen jumystar jalǵasýda.

Mysaly, Taraz qalasy men Shý jáne Merki aýdandarynda «Servıstik ákimdikter» ashyldy. Bul jobanyń maqsaty – memlekettik qyzmet kórsetetin mekemelerdi bir jerde shoǵyrlandyrý men azamattarǵa qolaıly jaǵdaı jasaýǵa arnalǵan. Iаǵnı, bul jerde atqarýshy bılik ókilderiniń jergilikti turǵyndarmen betpe-bet otyryp jumys jasaýyna esh kedergi joq. Onyń ústine sharýasy qaýyrt adam qalanyń túkpir-túkpirinde ornalasqan bólimderdi izdep sabylmaı, qajetti qyzmet túrlerin bir ǵımaratyń ishinde qınalmaı-aq bitirýine qol jetkizedi.

Sondaı-aq Jambyl oblysy polısııa departamenti jergilikti turǵyndarmen ashyq jumys júrgizý maqsatynda Jýaly jáne Merki aýdandarynda jańa bólimshelerdi jańa formatta ashty. «Azamattardy qabyldaý» bólmeleri arqyly quqyqtyq keńester men qajetti aqparatty, quqyq buzýshylyqtar men qylmystardyń aldyn alý sharalaryna qatysty usynys-pikirlerin bildirýge bolady. Aldaǵy ýaqytta oblystyń ózge aýdandarynda da «Servıstik ákimdikterdiń» ashylýy josparlanýda.

Oblys boıynsha 133 basshy kabınetterin 1-shi qabatqa kóshirip, halyqpen tyǵyz qarym-qatynas jasaýǵa kiristi.

Ashyqtyqty qamtamasyz etýdegi taǵy bir shara ol – memlekettik organdarynyń birinshi basshylarynyń «Jambyl – adaldyq alańy» jobalyq keńsesinde azamattardy qabyldaýyn uıymdastyrý. Onda jeke azamattardyń shaǵym-usynystary qaralyp, tıisti jaýaptar qaıtarylady. Búgingi kúnge munda bilim, densaýlyq saqtaý, áleýmettik qamsyzdandyrý, qurylys, jolaýshylar kóligi, jerlerdi paıdalaný, memlekettik kirister, sot júıesi, polısııa, memlekettik qyzmet, sybaılas jemqorlyqqa qarsy kúres salalary boıynsha birneshe qabyldaý ótkizilip, oń nátıjesin berip otyr.

Jalpy memlekettik qyzmetshilerdiń boıynda parasattylyq qasıetterin damytý maqsatynda QR Sybaılas jemqorlyqqa qarsy is-qımyl agenttigi janynan parasattylyq departamenti ashylǵan bolatyn. Departament jumysynyń maqsaty – jańa formatta, ashyqtyq prınsıpinde jumys isteıtin, kásibı shyńdalǵan memlekettik qyzmetshilerden turatyn kásibı apparat qurý. Bul baǵyttaǵy jumystar aldaǵy ýaqytta da jalǵasyn tabatyn bolady.