Jambylda oqýshylar arasynda lektorlar pýly quryldy

Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti jáne oblys ákimdiginiń bilim basqarmasy birlesip ótkizgen «Parasatty bolashaq» atty esse jazý baıqaýynyń jeńimpazdary parasattylyq elshilerine aınalǵan «lektorlar» pýlyn qalyptastyrdy. Belsendi qatysýshylardan qurylǵan parasattylyq «elshileriniń» maqsaty – bilim berý uıymdarynda oqýshylardyń parasattylyq mádenıetin qalyptastyrý, sybaılas jemqorlyqqa qarsy mádenıetin kóterýdiń tıimdi tájirıbesin taratý. 2019 jyly 11-18 qazan aralyǵynda oqýshylardan qurylǵan lektorlar pýly erikti túrde 93 mektepte bilim alýshylardyń boıynda parasattylyq pen akademııalyq tazalyq prınsıpterin qalyptastyrý, adamgershilik-etıkalyq qundylyqardy boıyna sińirýge baǵyttalǵan dárister men kezdesýler ótkizdi. Atalǵan is-sharalarǵa 4185 oqýshy qamtyldy.

Jalpy, Jambyl oblysyndaǵy bilim berý uıymdarynda oqýshylardy uıymshyldyqqa, adaldyqqa, eńbekqorlyqqa, kásipkerlik qabiletin shyńdaýǵa daǵdylandyrý maqsatynda osyndaı sharalar kóptep ótkizilýde.

Mysaly, Baızaq aýdanyndaǵy Ǵanı Muratbaev atyndaǵy gımnazııasynda jaqynda «Kúz bereke, kúz mereke» atty jármeńke ótti. Gımnazııa tálimgeri A.Ergalıevanyń uıymdastyrýymen «Aq jaýlyqty analar» on kúndiginiń aıasynda uıymdastyrylǵan merekelik jármeńkede analar satýshy mindetin atqardy. Sharaǵa 5-7 synyp oqýshylarynan quralǵan 16 top qatysyp, óz belsendilikterin kórsetti. Merekelik jármeńkede ádilqazylar quramy taǵam túrin, sapasyn, gıgıenalyq talaptardy saralady. Merekelik jármeńke baıqaýyna qatysýshy synyptar taqyrypqa sáıkes kıinip, ózderi daıyndaǵan dastarhandaryn qorǵady. Mysaly, 5 «A», 5 «Á», 5 «B» synyptary Reseı memleketin, 5 «V», 5 «G», 5 «D» synyptary Qazaqstan memleketin, 6 «A», 6 «Á», 6 «B» synyptary Týrkııa memleketin, 6 «V», 6 «G», 7 «V» synyptary Koreı memleketin, 7 «A», 7 «Á», 7 «B» synyptary О́zbekstan memleketin kórsetti. Jasulandyqtardan quralǵan oqýshylar ortada ózbek bıin bılep, Abaı atamyzdyń 175 jyldyǵyna oraı «Kúz» óleńin mánerlep oqydy. Oqýshylar, ata-analar, ustazdar jasaǵan jumys nátıjeli bolyp, birlik bar jerde tirlik bolatynyn is júzinde kórsetti.