Qulan óńirinde buqaralyq sport damýda

Jambyl oblysyndaǵy T.Rysqulov aýdanyn bylaıǵy jurt: «Sport sańlaqtarynyń ustahanasy» deıdi. Onyń jóni de bar. Eshbir aýdanda Olımpıada oıyndaryna qatysyp, bir altyn, eki kúmis, bir qola medal alǵan sportshylar joq shyǵar. Al Qulan óńiriniń ataǵyn Absent atty sáıkúlik búkil álemge pash etti. Boksshy Ermahan Ybyraıymov, palýandar Islam Baıramýkov pen Eldos Smetov, Aqjúrek Tańatarov, álemge aty áıgili bolǵan Álisher Erǵalı, Ádilet Daýlambaev, boksshy qyz Adına Qaldybaı aımaqtyń ǵana emes, memlekettiń maqtanyshymyz. Kúni keshe ǵana zeınetke shyqqan Beken Ábdiraıymov, dúnıeden erte ozǵan, jaýyryny jerge tımegen palýandar Qoshan Tánikeev, Serik Nurmanbetov, dańqty voleıbolshy Tańat Qambaralıevterdi el umytqan joq.

«At tuıaǵyn taı basar» demekshi búginde aldyńǵy tolqyn aǵalarynyń izin basyp, eki birdeı jasóspirimder sport mektebinde balalardy sportqa baýlyp júrgen Ulan Omarbekovtyń, ardager sportshy Esdáýlet Qurmanbekov, Nurasyl Moldabekov, Baqytbek Tolymbetov, Qanaǵat О́zbekov, Ashat Tilekeevtiń aýdan sportyna sińirgen eńbegi zor. Baýyrjan Momyshuly atyndaǵy mektepte jattyqtyrýshy bolyp júrgen Júnis Bektemisovtiń de shákirtteri bıik tuǵyrdan kórinýde. 10-shy synyp oqýshysy Elena Hýgol jeńil atletıkadan Qazaqstan birinshiligine qatysyp, 200 metr qa-shyqtyqqa júgirýden úshinshi oryn aldy.

-Aýdanda Elbasy N.Nazarbaevtyń tapsyrmasyna sáıkes, sporttyń buharalyǵyn arttyrý jóninen kóptegen ıgi sharalar júzege asyrylýda. Máselen, Qonaev aýylynda «Raýshanbektegi» sharýa qojalyǵynyń demeýshilik etýimen, Kókdónende aýyl aq-saqaldarynyń qoldaýymen kishi fýtbol alańdary salynýda. Mundaı stadıon Kamenka aýylynda, Qaraqatta bar. Aqyrtóbede baıyrǵy sport ardageri Á.Qaıynberdıev ashqan sport mektebi jumys isteıdi. Qazir aýdanymyzda fýtbol klýby qurylyp, aıaqdoptan aýdannyń namysyn qorǵaıtyn jastarymyz oblys birinshiligine qatysýda. Endi aldaǵy ýaqytta qazaqtyń ulttyq at sporty oıyndaryn damytý bizdiń basty nazarymyzda tur. О́ıtkeni, biz Absent syndy sáıgúligimizdiń atyn joqtatpaýymyz kerk dep oılaımyn. Sondyqtan kóparshylar men atbegiler, saıatshylar, qusbegiler klýbtaryn quryp, ony jandandyrǵanymyz jón,-deıdi aýdan ákimdigi dene shynyqtyrý jáne sport bóliminiń basshysy E.Shábeev.