Qoǵamdyq keńester qordalanǵan máselelerdi sheshýge nıetti

Jambyl oblysy ákimdiginde Jambyl oblystyq, qalalyq, aýdandyq qoǵamdyq keńesteri tóralqalarynyń teń ári áriptestik negizde aýmaqtyq ádistemelik-úılestirý keńesiniń «Qoǵamdyq keńesterdiń damýy» atty konferensııasy ótkizildi. Keleli jıyn Jambyl oblysy ákimdigi ishki saıasat basqarmasynyń «Jergilikti ózin-ózi basqarýdy jáne qoǵamdyq baqylaýdy damytý boıynsha aqparattyq ortalyqty uıymdastyrý» atty jobasy aıasynda «Jambyl oblysy jastar uıymdarynyń Qaýymdastyǵy» ZTB uıymdastyrýymen ótti.

Jıynda oblystyq Qoǵamdyq keńestiń Ádistemelik-úılestirý keńesiniń tóraǵasy Jandar Káribaıuly júrgizdi. Jandar Káribaıuly «Oblystaǵy qoǵamdyq keńesterdiń kúnderin» ótkizý týraly baıandady. Oblysta Qoǵamdyq keńetiń rólin kúsheıtip, aryz-shaǵymdardy jınaqtaý kerektigin aıta ketti. Jambyl oblystyq Qoǵamdyq keńestiń saıty ashylǵany belgili. Q-KENES.KZ saıtynda aýdandarda qandaı da bir kúrdeli máselelerdiń sheshilip, syn-eskertpeler qalaı oryndalyp jatqandyǵy týraly aqparattandyrylyp, jasalynǵan jumystardyń ashyqtyǵy kórsetilýi kerektigin aıtty.

Kún tártibindegi ekinshi másele boıynsha Jambyl oblystyq Qoǵamdyq keńesiniń múshesi, «Jambyl oblysy jastar uıymdarynyń Qaýymdastyǵy» ZTB prezıdenti Islambek Dastanuly Qoǵamdyq keńesterdiń 2019 jyldyń birinshi jarty jyldyǵynda halyq aldynda esep berý boıynsha qoǵamdyq monıtorıng jumysynyń nátıjesi týraly aıtty.

Sonymen qatar, jıyn barysynda ár-túrli máseleler talqylandy. Merki aýdandyq Qoǵamdyq keńesiniń tóraǵasy S.Quralbaı Surat aýylyndaǵy áleýmettik shıelenisti sheshýdiń joldaryn usyndy.

Talas aýdandyq Qoǵamdyq keńesiniń tóraǵasy qaýipti indet – esirtki boıynsha aýdanda narkologııalyq saraptama jasaıtyn orynnyń joq ekenin jetkizdi.

– Esirtkiniń túrleri óte kóp, onyń jeńil jáne aýyr, ómirge qaýipti túrleri kóbeıýde. Jeńil esirtki denege tez tarap ketedi. Qylmys túnde bolǵan jaǵdaıda biz Taraz qalasyna nemese Jańatas qalasyna jetkizgenshe ýytty zattyń qanda qaldyǵy da qalmaıdy. Osyǵan oraı, aýdannan arnaıy shtat bólip, medısına salasynan mamandar berilse degen usynysymyz bar. Qajet bolsa tıisti organdarǵa hat daıyndaýǵa daıynbyz, – dep aýdandyq Qoǵamdyq keńes tóraǵasy Aqynbek Bektaı másele kóterdi.

Barlyq aýdannyń usynystary men kóterilgen máselelerdi oblystyq Qoǵamdyq keńestiń tóraǵasy maquldap, aldaǵy ýaqytta birlesip jumys jasaıtynyn jetkizdi.