Úzdikter qataryna endi

M. H. Dýlatı atyndaǵy Taraz memlekettik ýnıversıteti QS EECA University Ranking-2020 halyqaralyq reıtıngisi boıynsha álemniń úzdik 350 joǵary oqý oryndarynyń qataryna endi.

Lıtva Respýblıkasynyń Kaýnas qalasynda ótip jatqan QS in Conversation «Halyqaralyq yntymaqtastyq arqyly tanymaldylyqty arttyrý: utqyrlyq, taný, brendıng» atty Halyqaralyq sammıtinde QS EECA-2020 (Emerging Europe & Central Asia ) reıtıngisiniń qorytyndysy ashyq túrde jarııalandy. Reıtıng qorytyndysy boıynsha Dulaty University QS EECA reıtıngisine alǵash ret qatysyp, úzdik 350 ýnıversıtet qataryna kirdi.

QS (Quacquarelli Symonds) EECA reıtıngisi damýshy Evropa jáne Orta Azııa elderiniń úzdik 350 ýnıversıtetin anyqtaıtyn bedeldi reıtıng. Atalmysh reıtıng ýnıversıtettiń 9 kórsetkishin taldaıdy. Olar: JOO-nyń akademııalyq jáne jumys berýshiler arasyndaǵy bedeli, stýdentter sanynyń qyzmetkerler sanyna araqatynasy, bir qyzmetkerge keletin ǵylymı jarııalanymdar sany, sıtatalar sany, ýnıversıtettiń Internettegi tıimdiligi, ǵylymı dárejeleri bar qyzmetkerler úlesi, sheteldik qyzmetkerler jáne sheteldik stýdentter sany. Osy oraıda reıtıngke M.Lomonosov atyndaǵy Máskeý Memlekettik ýnıversıteti (Reseı) kósh bastap, Charlz ýnıversıteti (Chehııa), Varshava tehnologııalyq ýnıversıteti (Polsha), Vılnıýs Ýnıversıteti (Lıtva) jáne Stambýl ýnıversıteti (Túrkııa) syndy ózge de bedeldi oqý oryndar qatysty.

Álemniń ozyq ýnıversıtetterin biriktirgen QS-in Conversation «Halyqaralyq yntymaqtastyq arqyly tanymaldylyqty arttyrý: utqyrlyq, taný, brendıng» sammıtinde álemdik eńbek naryǵynda úlken suranysqa ıe bolatyn qabiletti maman daıyndaý, ǵylymdy damytý, akademııalyq utqyrlyq týraly túrli máseleler aıtyldy.

Esterińizge sala keteıik, M. H. Dýlatı atyndaǵy Taraz memlekettik ýnıversıteti 1958 jyly qurylǵan. Búginde oqý ordasy elimizdegi eń iri memlekettik joǵary oqý oryndarynyń biri sanalady. TarMÝ oblystaǵy jalǵyz memlekettik kópbeıindi joǵary oqý orny bolyp tabylady. Ýnıversıtette jalpy kólemi 73924,4 sharshy m. quraıtyn 14 oqý-laboratorııalyq ǵımarat jáne jańa ólsheý quraldarymen jabdyqtalǵan 155 laboratorııa bar.