Kezegen aıaq shoq basar...

Jasóspirimder qylmysynyń aldyn alý túıtkildi túp tamyrymen joıyp jibermese de, balamen jumys isteýde qajetti daǵdylarǵa baǵyt beretini anyq. Mundaı jumystardy júıeli júrgizýde úkimettik emes uıymdardyń úlesi orasan. Osyǵan baılanysty óńirde Jambyl oblysy ákimdigi Bilim basqarmasynyń memlekettik áleýmettik tapsyrysy sheńberinde "Arylý-Ońtústik" qoǵamdyq birlestiginiń muryndyq bolýymen "Jasóspirimder arasynda quqyq buzýshylyqtyń aldyn alý sharalaryn uıymdastyrý men júrgizý" taqyrybynda semınar-trenıngter uıymdastyryldy.

Bıyl 8 aıdyń qorytyndysy boıynsha kámelet jasqa tolmaǵan jasóspirimderdiń qylmysy 13,4 paıyzǵa artyp otyr. Mektep oqýshylarynyń júris-turysyn qadaǵalaýǵa qatysty túrli reıdter uıymdastyrylǵanymen nátıje joq. Mamandardyń aıtýynsha, kúndelikti ótkizilgen reıdtik jáne profılaktıkalyq sharalardyń nátıjesinde polısııa bólimshesine 3082 kámelet jasqa tolmaǵan jasóspirim jetkizilgen.Al, olardyń ata-analaryna 2796 ákimshilik hattama toltyryp, aıyppul salynypty. Alaıda, bul kórsetkish byltyrǵy jylǵa qaraǵanda 496 derekke artqan. Kámeletke tolmaǵandar arasynda qylmystyń ósýi ótkir másele, óıtkeni olar eresekterge qaraǵanda tájirıbesi men biliminiń jetkiliksizdiginen kóptegen problemalardy sheshe almaıdy. Osyndaı faktorlardyń aldyn alý maqsatynda "Arylý-Ońtústik" qoǵamdyq birlestigi tabandy túrde eńbek etip keledi. Uıym mamandary jasóspirimmen jumys isteýde negizgi basymdyq ustazdarǵa beriletinin eskerip Jambyl oblysyndaǵy barlyq on aýdanyndaǵy mektepterde arnaıy semınar trenıngter ótkizdi. Atalmysh oqytý semınarlaryn Abaı atyndaǵy ulttyq pedagogıkalyq ýnıversıtetiniń oqytýshysy, psıhıkalyq saýyqtyrý ortalyǵynyń mamany Meıramgúl Ibashova júrgizip, ustazdar arasynda óz tájirıbesimen bólisti.

Trenıngter barysynda ustazdar men mektep dırektorlarynyń tárbıe isi jónindegi orynbasarlaryna keńinen túsindirý jumystary júrgizildi. Túrli sıtýasııalyq oıyndar oınatylyp, balalarǵa sergitý jumystaryn júrgizýdiń artyqshylyqtary da aıtyldy.

Jýaly aýdanynda ótken semınardan psıhologııalyq bilimin tereńirek jetildirgen Bıbigúl Kósherbaeva mundaı jıyndardyń pedagogtar úshin mańyzyn erekshe atap ótti.

Jalpy óńirde oblystyq bilim basqarmasynyń memlekettik áleýmettik tapsyrysy sheńberinde "Arylý-Ońtústik" qoǵamdyq birlestiginiń muryndyq bolýymen ótken trenıngterge barlyǵy 300-ge tarta synyp jetekshi, 300 mektep dırektorynyń orynbasary qamtylǵan. Kámeletke tolmaǵan jastardyń arasynda qylmysty aldyn alýdyń keshendi sharasy retinde baǵalanǵan bul trenıngter aldaǵy ýaqytta da jalǵasyn taba bermek.