Kóne shaharda kópqabatty úıler kúrdeli jóndeýden ótýde

Memleket basshysy Q.Toqaevtyń Qazaqstan halqyna alǵashqy Joldaýynda mán bergen mańyzdy máselelerdiń qatarynda ınfraqurylymdy damytý jaıy da bar. Osy oraıda Prezıdent «Aldaǵy úsh jyl ishinde turǵyndardy taza aýyz sýmen jáne sý jetkizýmen qamtamasyz etýge shamamen 250 mıllıard teńge bólinedi.

Atqarýshy bılik organdary «Nurly jol» baǵdarlamasyn tolyq jáne sapaly iske asyrýǵa basa mán berýi kerek.

Bul – strategııalyq joba. Sonyń arqasynda búkil kólik ınfraqurylymy jańǵyrtylady.

Osy maqsatqa oraı, memleket 2022 jylǵa deıin 1,2 trıllıon teńgeden astam ınvestısııa salady.

Úkimet buǵan deıin de kóp qarajat bólgen bolatyn, biraq onyń kóbi qumǵa sińgen sýdaı joq bolyp ketti. Ashyǵyn aıtsaq, sheneýnikterdiń qaltasyna ketti, al taza sý, jol jáne basqa da ınfraqurylymnyń jaǵdaıy áli de sol kúıinde.

Bul joly Úkimet pen Parlament Esep komıtetimen birlesip, bıýdjet qarajatyn tolyǵymen tıimdi paıdalanýdy qamtamasyz etýi tıis» dep atap ótti.

Búginde Jambyl oblysynyń ortalyǵy – Taraz qalasy úlken qurylys alańyna aınalǵan. Munda aımaq basshysy Asqar Myrzahmetovtyń bastamasymen tasjoldar tóselip, kópqabatty turǵyn úıler men ózge de áleýmettik nysandar kóptep salynýda.

Mysaly, qalanyń «Taıvan» alqabynda jol salý jumystary qarqyndy júrgizilýde. «Taıvan» alqabynda barlyǵy 18 kóshe bolsa, onyń uzyndyǵy 27,7 shaqyrym. Qurylys jumystaryna burylystarymen qosa eseptegende 481 564,0 myń qarjy qarastyrylǵan. Qazirgi tańda 18 kósheniń 14 kóshesi tolyǵymen aıaqtalýǵa jaqyn. Aıta keterligi, Taraz qalasynda jalpy uzyndyǵy – 78,022 shaqyrym jol jóndelýde. Ol degenimiz 138 kóshe jáne burylystar men tuıyqtar bar. 85 ýchaskede asfalttaý jumystary júrgizilýde. 20-kóshe jáne 3-burylysqa asfalt jabyndysy tóselip, aıaqtalý ústinde. 46-kóshe men 14-burylysqa, sondaı-aq 2-tuıyqqa asfalt jabyndysyn tóseýge daıyndyq pysyqtalýda.

Al «Qarasý» shaǵyn aýdanynda áleýmettik osal top ókilderine arnalyp kópqabatty turǵyn úıler salynýda. Sonymen qatar «Aqbulaq» shaǵyn aýdanyndaǵy №9, №17 úılerde kúrdeli jóndeý jumystary júrgizilýde. Atalǵan turǵyn úıler 1966 jyly salynǵan, 5 qabatty, 70 páterli. О́z kezeginde turǵyn úılerdiń shatyrlary, ınjenerlik jelileri (jylý júıesi, ystyq jáne muzdaı sý, káriz júıesi, elevator toraby, elektr júıesi), kireberisteri kúrdeli jóndeýden ótti. Jóndeý jumystarynyń jalpy quny 292 945 teńgeni quraıdy.

Aǵymdaǵy jyly Taraz qalasynda barlyǵy 989,6 mln. teńgege 25 úıge jóndeý jumystary júrgizilýde. 540 mln.teńge qala bıýdjeti esebinen bolsa, qalǵan qarajat aldyńǵy jóndeý jumystary júrgizilgen úılerden qaıtarym qarjy esebinen.

Búgingi tańda qala boıynsha barlyǵy 1298 kóppáterli turǵyn úıler bar. Onyń ishinde búgingi kúnge 300-ge jýyq úı kúrdeli jóndeý jumystaryn qajet etedi.

Keler jylǵa 3,4 mlrd.teńgege 80 úıdiń jóndeý jumystaryna respýblıkalyq qazynadan qarajat bólýge bıýdjettik ótinim Qurylys komıtetine tapsyryldy.