Eldi mekenderdiń elektrondyq kartasy jasalyp jatyr

Kelesi jyly elimizde jalpyulttyq halyq sanaǵy ótetini belgili. Osy jaýapty kezeńge ońtaıly daıyndyq sharalary Jambyl oblysy aýmaǵynda óz deńgeıinde qolǵa alynýda. Bul oraıda oblys ákimdiginiń sáýlet jáne qala qurylysy basqarmasymen óńirdegi eldi mekenderdiń «Elektrondyq kartasy» ázirlenip jatyr, dep jazady Qamshy.kz aqparat agenttigi. 

Eldi mekenderdiń «Elektrondyq kartasyn» daıyndaýǵa 20 mıllıon teńgege jýyq qarjy qarastyrylǵan. Qazirgi tańda bul qarjyny maqsatty ıgerýde 3 merdiger kompanııamen kelissózder júrgizilýde.

–Taraz qalasy ákimdiginiń sáýlet jáne qala qurylysy bólimi men aýdandardaǵy qurylys, sáýlet jáne qala qurylysy bólimderiniń tapsyrysyna saı eldi mekenderdiń «Elektrondyq kartasyn» ázirleý jumystaryn «Sunrise Lab», «Taraz Taý Joba», «GIS» jaýapkershiligi shekteýli seriktestikteri júrgizbek. Qazirgi tańda Taraz qalasy ǵana merdiger kompanııamen kelissóz júrgizip jatyr. Aýdandyq bólimder tıisti jumystardy oryndaýshy kompanııalarmen kelisim-shartqa otyryp qoıdy. Al Sarysý, Talas aýdandarynda «GIS» jaýapkershiligi shekteýli seriktestigimen júrgizilgen jumystar aıaqtaldy. Qalǵan aýdandarda elektrondy kartany aıaqtaý merzimi qarasha aıynyń sońy dep kórsetilgen. Tek Taraz qalasy men Merki, Moıynqum aýdandarynda elektrondy karta jyl sońyna deıin aıaqtalady. Bir sózben aıtqanda 2020 jyldyń alǵashqy kúninen Taraz qalasyn qosa alǵanda oblystaǵy barlyq aýdandaǵy eldi mekenderdiń «Elektrondyq kartasy» daıyn bolmaq. Sáıkesinshe Taraz qalasynyń elektrondyq kartasyn ázirleýge 7 mıllıon teńge qazyna qarjysy jumsalsa, aýdandardyń barlyǵynda bul jumystardy oryndaýǵa 1 mıllıon 262 myń 500 teńge kóleminde qarjy qarastyryldy, – deıdi oblys sáýlet jáne qala qurylysy basqarmasy basshysynyń mindetin atqarýshy Dáýlet Dosanov.

Atap ótý kerek aǵymdaǵy jyldyń 19 maýsymynda Qazaqstan Respýblıkasy Úkimetiniń «2020 jyly Qazaqstan Respýblıkasy halqynyń ulttyq sanaǵyn ótkizý» týraly qaýly shyqty.Atalǵan qujatqa saı Qazaqstan Respýblıkasy aýmaǵynda jalpyulttyq halyq sanaǵy keler jyldyń 1-30 qazan aralyǵynda ótkiziledi. Sondaı-aq bul qujatta elimiz táýelsizdik alǵannan bergi úshinshi ret ótkizilgeli jatqan jalpy ulttyq halyq sanaǵy alǵash ret «e-Statıstıka» elektrondyq bazasymen júrgiziletindigi de aıtylǵan.