Kenshiler shaharyndaǵy kelisti eńbek

Temirjol salasyn damytý-Memleket basshysy Q.Toqaevtyń «Syndarly qoǵamdyq dıalog-Qazaqstan turaqtylyǵy men órkendeýiniń negizi» atty Joldaýynda aıqyndalǵan mindettiń biri. Osy oraıda irgetasy qalanǵanyna 50 jyl tolǵan Jańatas qalasyndaǵy temir jol stansııasynyń ujymy da Joldaý júktegen mindetterdi júıeli júzege asyrýǵa judyryqtaı jumylýda. Bul mańda kenniń mol qory barlanǵan sátten ony ıgerý isine bilekti sybanyp kirisken Keńes odaǵy bıligi bul jumysty ólkege temir jol jelisin tartýdan bastady. Osylaısha 1963 jyly taý shatqalynyń arasyna ornalasqan qazirgi Jańatas qalasyna alyp baratyn temir jol relsi kósilip jatty. Bul bitken sharýa óndiristi qalanyń qurylysyn júrgizýge, ondaǵy qısapsyz kendi ıegerýge, kerek-jaraqty tasymal isine tyńnan túren saldy.

Al qazir Jańatas temir jol stansııasy Jambyl oblysyndaǵy júk tasymaldaý isindegi kóshbasshy mekeme sanalady. Ári ol osy óńirdegi ken óndirý isindegi alpaýyt kásiporyndarynyń ónimderin tasymaldaý mıssııasyn minsiz oryndap keledi.

Jańatasqa temir jol jelisi 1963 jyly kelgenimen, mundaǵy stansııa 1964 jyldyń 30 qazanynda saltanatty túrde ashyldy. Al arada eki kún ótken soń Jańatas kenishi ıegerile bastady. Sáıkesinshe júk poıyzdary da osy kúnnen Qarataý kenin qazirgi Taraz qalasyna jetkizý mindetine kiristi. Stansııany ár jyldary Iýrıı Perepelkın, Iаkov Sabynın,Ábdýáli Danaev, Erbol Ospanov, Murat Tuıaqov, Úmitbek Rysbekov, Beken Narbaev syndy ardager temirjolshylar basqaryp, onyń el ekonomıkasyndaǵy asa mańyzdy mindetin minsiz atqarý isin abyroımen uıymdastyra bildi. Qazir bul qyzmetti Nurbek Tólegenov atqarýda.

– Jalpy Jańatas temir jol stansııasy ekinshi klasty stansııa sanalady. Bul mekeme temir joldaǵy júk tasylmaldaý isinde oblys boıynsha kósh basynda keledi. Táýligine jańatastyq temirjolshylar 128 vagon fosfor rýdasy men fosfor unyn jóneltedi. Fosfor rýdasy temir jolmen Asa stansııasyna, al fosfor uny Shaıqoryq stansııasyna deıin jetkiziledi. Odan bólek, osyndaǵy Sozaq stansııasynan táýligine 50 vagonǵa jýyq hımııalyq qyshqyldar men tabıǵı ýran júkteledi. Bul ónimder osy jerden Reseı men Qytaıǵa qaraı jol tartady.

Sońǵy jyldary bizdegi júk tasymaldaý kólemi 3 esege artqanyn maqtanyshpen aıtqym keledi. Bul bizdiń eńbekkerlerlimizdiń eseli isiniń nátıjesi dep bilemin. Sondyqtan, sáıkesinshe stansııanyń klass deńgeıin birinshi klasqa aýystyrýǵa nıet etip otyrmyz. Sol arqyly temirjolshylardyń jalaqysyn kóbeıtý, shtat sanyn ulǵaıtýǵa qol jetkizemiz.

Búginde stansııada 123 adam jumys jasaıdy. ,–deıdi stansııa bastyǵy Nurbek Asqanbaıuly.

Stansııa áleýetti tapsyrys berýshileri qoıǵan talaptyń údesinen shyǵýda materıaldyq-tehnıkalyq bazasyn nyǵaıtýǵa ıek artqan. Ári olardyń «Qazfosfat», «EýroHım Qarataý» jaýapkershiligi shekteýli seriktestikterimen áriptestik ornatýy Jańatas temir jol stansııasynyń halyqaralyq júk tasymaly salasyndaǵy áleýetin tanyta bastady. О́ıtkeni, stansııa arqyly «EýroHım Qarataý» kompanııasy óz ónimderin Soltústik Kavkaz temir jol jelisindegi Belorechensk stansısy men О́zbekstan temir jol jelisindegi Ozodlık stansııasyna jóneltýde.

Keler jyldan bastap stansııanyń áleýetti tapsyrys berýshileri ónim kólemin arttyrýdy josparlap otyr. О́z kezeginde bul faktor Jańatas temir jol stansııasynyń júk tasymaldaý qabiletin taǵy birneshe esege ulǵaıtýǵa negiz bolmaq. О́ńirdegi hımııa ónerkásibiniń alpaýyttarynan bólek, Jańatas stansııasy «Jaras» munaı bazasy, Munaı óńdeý zaýyty, «Aıanat» munaı ónimderi, «Asyl tuz» sekildi kompanııalardyń da ónimderin tasymaldaý boıynsha tapsyrystaryn talapqa saı oryndaıdy. Qazirgi tańda stansııanyń 8 júk tıeý tuıyǵy bar. Búginde onyń ekeýinde Jambyl oblysy aýmaǵyndaǵy Sarysý aýdany turǵyndary úshin kómir satylyp jatyr.

Stansııa bastyǵynyń aıtýynsha, jaqynda, qyrkúıek aıynyń orta sheninde temir joldyń tehnıkalyq áleýetin baǵamdaý maqsatynda relsterge tolyq tekserý jumystary júrgizilgen. Bul júk poıyzdarynyń qysqy maýsymda esh kedergisiz qozǵalysyn qamtamasyz etý maqsatynda jasalyp otyr. Mundaı tekserýler jylyna eki ret ótkizilip turady. Ári bul tekserýler asa jaýapty kezeń aldyndaǵy temir jol jelileriniń tehnıkalyq áleýetin saralaýǵa múmkindik beredi.