• USD 468.56

  • EUR 497.56

  • RUB 7.3

  • CNY 67.18

29 Naýryz, 13:43:54
Almaty
+35°

Temir jol boıyndaǵy tártip buzýshylyqty, urlyq-qarlyqty qadaǵalaıtyn, baqylaıtyn qyzmettiń baryn bireý bilse, bireý bile bermeıdi. Mundaǵy qyzmetkerler shetinen qyraǵy, arnaıy tehnıkamen jaraqtandyrylǵan, qarý-jaraqpen de qamtylǵan. «Áskerılendirilgen temir jol kúzeti» AQ dep atalatyn mekemeniń Taraz qalasyndaǵy fılıalyna at basyn burǵanymyzda kóz jetkizdik buǵan.

Fılıal dırektory Baýyrjan Týlepbergenovtiń aıtýynsha, ujymda 800-den astam azamat eńbek etedi. Onyń 600 shaqtysy kúzet qyzmetindegi jigitter. Olardyń árqaısysy jumysqa kirerde jiti tekserýlerden ótken, fızıkalyq, psıhologııalyq turǵydan múmkindikteri ábden zerdelengen. «Ásirese, kúzet qyzmetin atqaratyn mamandarymyzdyń barlyǵy-derlik Otan aldyndaǵy boryshtaryn ótep kelgen, ysylǵan. Olarǵa kúzet jumysyn senip tapsyrýǵa bolatyndyǵyna kóz jetkizgenbiz», - deıdi Baýyrjan Amantaıuly.

Fılıaldyń Taraz qalasynan bólek, Saryshaǵan, Shý, Lýgavoı jáne Qyrǵyz elimen shekaradaǵy Maımaq stansalarynda bólimsheleri bar. Budan ózge, shuǵyl jaǵdaıda áreket etetin arnaıy top ta jasaqtalǵan. «Bul shuǵyl áreket etetin topta 29 maman qyzmet etetin bolsa, Taraz qalasyndaǵy temir jol boıyn 230 mamanymyz kúzetedi. Al Shý stansasynda – 218, Lýgavoıda – 44, Saryshaǵanda – 69, Maımaq stansasynda 24 azamatymyz múltiksiz qyzmet atqarýda», - dep jalǵady sózin mekeme basshysy.

Aımaqtaǵy Taraz, Shý qalalarynda oryn tepken vokzaldar qozǵalys jıi oryn alatyn nysandar qataryna jatady. Ujymnyń olardaǵy ahýaldy, jolaýshylar júgin tekseretin 100 qyzmetkeri bar.

Temir jol boıyndaǵy áskerılendirilgen kúzet qyzmetine qarý-jaraq pen qural-jabdyqtardan bólek, 10 avtokólik bólingen. Olar mamandardy qajetti nysanǵa der kezinde jetkizýge saqadaı saı tur.

Baýyrjan Amantaıulynyń aıtýynsha, áskerılendirilgen kúzet qyzmeti bolǵan soń, mamandardyń tótenshe oqıǵalarmen betpe-bet keletin kezderi az emes kórinedi. Máselen, bıylǵy jyldyń basynda Tátti stansasynda mynadaı jaǵdaı tirkelipti: Vokzalda kezekshlikte turǵan qyzmetker Murat Tileýqulov temir joldan kezekti ret ótip jatqan júk vagondarynan bir adamnyń sulbasyn baıqap qalady. Ol áriptesterine der kezinde habarlap úlgergen. Áskerılendirilgen mamandar vagon sońynan teksere barǵanda, vagondardyń ishinde shynymen beımálim kúdiktini qolǵa túsiredi.

«Onyń júk poıyzynda ne maqsatpen júrgeni anyqtalyp, arnaıy qujat toltyrylyp, jelilik temir jol polısııasy bólimshesine tapsyrdyq. Kishkene balanyń qyraǵylyǵy úshin ata-anasyna alǵysymyzdy bildirdik», - deıdi kúzet qyzmetiniń basshylyǵy.

Dál osy ispetti oqıǵa shilde aıynda Birlik stansasynda da oryn alǵan. «Ol kezde de ózimizdiń jigitter ábjildik tanytty. Ádettegideı temir jolmen ótip bara jatqan júk vagondarynyń birinen bir adamdy baıqap úlgergen qyzmetkerimiz Z.Janábilov shuǵyl áreket etetin topqa habarlaıdy. Jiti tekseris nátıjesinde urlyq nıetindegi azamatty quryqtadyq. Oǵan qatysty jedel hattama toltyrylyp, Shý stansasyndaǵy qaýipsizdik qyzmetine tapsyryldy», dep túıindedi «Áskerılendirilgen temir jol kúzeti» AQ Taraz qalasyndaǵy fılıalynyń dırektory.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir