Temirjol-ekonomıka kúretamyry  

Qazaqstan Respýblıkasynyń Tuńǵysh Prezıdenti Nursultan Ábishuly Nazarbaev egemen elimizdi damytý baǵytyndaǵy mindetter qatarynda kólik ınfraqurylymyn damytý máselesin nazardan tys qaldyrǵan emes. О́ıtkeni, jol da, kólik tasymaly da ekonomıkanyń ózegi ispettes. Rasynda da kólik – el ekonomıkasynyń ınfraqurylymyn qalyptastyratyn salalardyń biri ári biregeıi. Naqty ári úzdiksiz jumys isteıtin kóliktik keshen bolmaıynsha memlekettiń ekonomıkasy oıdaǵydaı damı almaıdy. Bul eń aldymen, temirjol kóligine qatysty, sol arqyly halyqaralyq jáne aımaqaralyq júkter men jolaýshylar tasymalynyń negizgi bóligi júzege asyrylady. «Temirjol – el ekonomıkasynyń kúretamyry» dep sondyqtan da beker aıtylmasa kerek.

Memleket basshysy Qasym-Jomart Toqaevtyń Qazaqstan halqyna arnaǵan alǵashqy Joldaýynda da bul máselege aıryqsha nazar aýdaryldy. Búginde Jambyl oblysynda da bul turǵyda jemisti jumystar atqarylýda. Jambyl Júk tasymaly bólimshesiniń dırektory Berik Aqshalovtyń aıtýynsha, Joldaý júktegen mindetter qazirdiń ózinde iske asrylýda.

«Qazaqstan Respýblıkasynyń Prezıdenti Qasym-Jomart Kemeluly Toqaev «Syndarly qoǵamdyq dıalog-Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynda temir jol salasyna toqtalyp ótti. Memleket basshysy temir jol salasyndaǵy qoldan jasalatyn bılet tapshylyǵyn joıýdy jáne ony tez arada qolǵa alýdy tapsyrdy. Munymen qosa, Prezıdent búginde basym baǵyttyń biri bolyp otyrǵan «qarapaıym zattar ekonomıkasyn» da umytpaýdy eskertti», - dep atap ótti bólimshe basshysy.

B.Aqshalovtyń aıtýynsha, jalpy, saladaǵy kemshilikterdi joıyp, jumysty jetildirý baǵytynda atqarylyp jatqan jumystar az emes. Sonyń birin atap aıtar bolsaq, «Jolaýshylar tasymaly» poıyzyna bılet alý bıyl 1 shildeden bastap avtomattandyrylǵan júıe arqyly iske asyrylyp keledi.

«Elektrondy temirjol bıletteri fıskaldy chek retinde sanalyp, jolaýshylardy esepke alý men otyrǵyzýǵa negiz bolady. Bul óz kezeginde mundaǵy alypsatarlardyń zańsyz áreketteri men ózge de birqatar qıturqylyqtardyń aldyn alýǵa sep bolýda. Áıtkenmen, keıbir kemshilikter túp-tamyrymen joıyldy dep te aıta almaımyz. Sondyqtan aldaǵy ýaqytta Prezıdent Joldaýy aıasynda osy baǵytta jumysymyzdy jetildirip, jandandyra túsetin bolamyz», - dedi salanyń jaýapty mamany.