Týǵan jerdiń tuǵyry bıik

Memleket basshysy N.Á.Nazarbaev aıtqandaı, «Patrıotızm - kindik qanyń tamǵan jerińe, ósken aýlyńa, qalań men óńirińe, ıaǵnı týǵan jerińe degen súıispenshilikten bastalady». Rasynda da, Uly dalanyń urpaǵy ushqan uıasyn umytýdy uıat sanaıdy. Kerisinshe, qarlyǵashtyń qanatymen sý sepkepkeı, qarashańyraqqa qaraılasqysy keledi. Mine, sondaı úlken júrekti azamattyń biri- Jambyl oblysy, Sarysý aýdanynyń týmasy, «Alga Diamond» kompanııasynyń prezıdenti Janbolat Bekmusaev. Ol qansha jyraqta júrse de, týǵan aýylyna qol ushyn sozýdy esten shyǵarǵan emes. Kásipker Sarysý aýdanyndaǵy Baıqadam Qashqynbaev atyndaǵy orta mektep janyndaǵy ınternet úıiniń balalaryn kıim-keshekpen, azyq-túlikpen jáne jıhazdarmen qamtamasyz ete otyryp, kómek kórsetýde. Budan bólek Saýdakent aýylynda «Strıtvorkaýt» sporttyq alańdarynyń qurylysyna demeýshilik jasaǵany jáne bar. Sonymen qatar Janatas qalasynda Aýǵan soǵysy ardagerleriniń qurmetine estelik taqta ornatqanyn el biledi.

Qoly ashyq azamattyń qaıyrymdylyǵy eskerýsiz qalǵan joq. Ol byltyr «Jomart júrek» jobasy aıasynda «Jyl mesenaty» atanyp, oblys ákimi Asqar Myrzahmetovtiń Alǵys hatyna ıe boldy. Sonymen qatar belsendi azamattyq ustanymy úshin QR Qoǵamdyq damý mınıstri Darhan Káletaevtyń dıplomymen marapattaldy.

-«Árkimniń týǵan jeri-Mysyr shahary» deıdi halyq danalyǵy. Kindik qanyń tamyp, balalyq shaǵyń ótken, tálim-tárbıesimen talpyndyrǵan, úlken ómirge jol siltegen aýyl qashanda qymbat. Qashanda ystyq. Týǵan jerdiń kıesi men qasıeti týraly Elbasymyz «Bolashaqqa baǵdar: rýhanı jańǵyrý» atty mazmundy maqalasynda da keńinen tarqatyp, keremet oı saldy.

Shetelde 10-15 kún bolyp, elge qaıtyp kele jatqanda boıymdy saǵynyshpen qatar maqtanysh sezimi de kerneıdi. Qaımaǵy buzylmaǵan qazaqylyǵymyzdyń ózi úlken qazyna. Ushy-qıyry joq ulan ǵaıyp atyrap, babadan qalǵan baıtaq meken -eń basty baılyǵymyz. Sol baılyqqa qaıtyp kele jatqanyma qýanamyn. Syrtta syldyr sýdyń ózin ájeptáýir aqshaǵa satyp alasyń. Al bizdiń elde sý degenimiz tıyn. Sonda osyndaı baı elde turatynyma shúkir deımin. Álbette, onyń barlyǵy Elbasynyń kóregendigi men syndarly saıasatynyń arqasy. Men 2006 jyly qajylyq paryzymdy ótep keldim. Sonda júrip arab jigitteriniń ishinen ýnıversıtette oqıtyn azamatty attaı qalap, ózime ustaz ettim. Qajylyq barysynda qasymda júrip, bilgenin úıretýge tyrysty. Ol bir sózinde Qazaqstannyń ıslam dinin ustanatyn elderdiń ishinde óte tártipti el ekendigin jetkizdi. Sol sekildi ózimizdeı azamattar álemge elimizdiń qandaı ekendigin dáleldeýimiz kerek,-deıdi Janbolat Bekmusaev.