О́ndiris oshaǵyndaǵy órkendi ister

Údemeli ındýstrıaldy-ınnovasııalyq damytý baǵdarlamasy aıasynda Jambyl oblysyndaǵy Qarataý qalasynyń mańynan natrıı sıanıdi zaýytynyń qurylysyn qolǵa alǵan «Talas Investment Company» jaýapkershiligi shekteýli seriktestigi az ýaqyttyń ishinde-aq aıaqqa nyq turyp, damýdyń dańǵyl jolyna tústi. Naqty 2017 jyly quny 3,7 mıllıard teńge bolatyn 5700 tonna natrıı sıanıdi men 1331 tonna ammonıı sýlfaty óndirildi. Al 2018 jyldyń qorytyndysy boıynsha óndiris kórsetkishteri 1,5 esege ósti, ıaǵnı 6,2 mıllıard teńgeden astam somany quraıtyn 8023 tonna natrıı sıanıdi men 2259 tonna ammonıı sýlfaty óndirildi. Qabyldanǵan bıýdjetke sáıkes bıyl óndiristiń jobalyq qýatyn 15 myń tonna natrıı sıanıdine jáne 5000 tonna ammonıı sýlfatyna jetkizý kózdelip otyr. Bıylǵy jyldyń naýryz aıynda natrıı sıanıdi óndirisiniń kórsetkishi jobalyq qýattylyqtyń ortasha aılyq eseptik kórsetkishine jetkenin aıtyp ótken jón.

Kompanııadaǵy ónerkásiptik-óndiristik personaldyń sany 2019 jyldyń 1 sáýirinde 552 adamdy qurady. Onyń ishinde 108 adam ákimshilik qyzmetkerleri. Jalpy jumysshylardyń 124-i – áıel azamattar. Kompanııa jumysshylarynyń ortasha jasy 30 ben 40 jastyń arasyn kórsetip otyr. Al 2019 jyldyń aqpan aıyndaǵy jumysshylardyń ortasha jalaqysy 116350 teńge boldy, sondaı-aq óndiristik ǵımarattardaǵy eden jýýshy jumysshysynyń eń tómengi jalaqysy 49273 teńgeni qurady. Aı saıynǵy óndiristik kórsetkishterdegi jetistikterge saı negizgi óndiristik bólimsheler jumysshylaryna syıaqylar qarastyrylǵan.

Barshaǵa belgili, zaýyt jumysy endi qarqyn alyp keledi. Dese de, kompanııa basshylyǵy jumys jaǵdaıy zııandy kásiporyndarǵa qoıylatyn zańnama talaptaryn buljytpaı oryndaýda. Qazirgi ýaqytta kásiporynnyń qyzmetkerleri arnaıy kıimmen, jeke qorǵanys quraldarymen, zaýyt esebinen beriletin, quramyna sút ónimderi kiretin kúndelikti profılıktıkalyq tamaqpen qamtylǵan. Sonymen qatar, jumys kestesine sáıkes qyzmetkerlerdi zaýytqa jáne keri tasymaldaý úshin avtobýstar qarastyrylǵan. Tehnıka qaýipsizdiginiń barlyq amaldary da saqtalýda.

Jumysshylarǵa materıaldyq kómek kórsetý, syıaqylar men merekelik kúnderge oraı tólenetin tólemder sekildi ujymdyq shart boıynsha qabyldanǵan barlyq mindetter oryndalýda. Budan bólek, kompanııa Qarataý qalasynda turatyn az qamtylǵan jáne kópbalaly otbasylarǵa qaıyrymdylyq kómek kórsetýde belsendilik tanytyp keledi. Búgingi tańda az qamtylǵan otbasynan shyqqan stýdent kompanııa demeýshiligimen joǵary oqý ornynda bilim alýda.