Bozdaq órt sóndirýshiler eske alyndy

Qazaqstan Respýblıkasy Qutqarýshy kúniniń 24 jyldyǵy qarsańynda eki órt sóndirýshi bólimshelerde qaıtys bolǵan órt sóndirýshiler men qutqarýshylardyń eskertkishteri men obelıskilerine saltanatty túrde gúl shoqtary qoıyldy, dep habarlaıdy Almaty qalalyq ákimdiktiń baspasóz qyzmeti.

Qalyptasqan dástúr boıynsha sharaǵa qatysýshylar TJD basshysynyń mindetin atqarýshy Erlan Álibekovtyń basshylyǵymen Almaty qalasynyń órtke qarsy qyzmet garnızonynda bir mınýt únsizdikpen qaıtys bolǵan qutqarýshylardy eske aldy.

Azamattyq qorǵanys ardagerleriniń atynan Almaty qalasy TJD ardagerler Keńesiniń tóraǵasy Amantaı Malǵojdarov sóz alyp:

«Bul kún zilzala nemese stıhııaly apattar kezinde qıyn jaǵdaıda qalǵan jandarǵa kómektesýge janushyra asyǵatyn naǵyz batyrlardyń merekesi. Bizdiń batyl jigitterimiz tótenshe jaǵdaıda qalǵan jandardyń sońǵy úmiti bolyp tabylady», – dep atap ótti polkovnık.

Almatynyń barlyq órt sóndirýshi qyzmeti, jedel-qutqarý jáne basqa da bólimsheleri 2019 jyldyń basynan beri qaraı TJ aımaǵynan 963 adamdy alyp shyqty, TJ kenetten bolǵan oqıǵalarynyń zardaptaryn joıý úshin 451 jerge bardy, 916 adamnyń ómirin qutqardy, 796 mln. teńgeniń materıaldyq baǵaly zattaryn saqtap qaldy.

Tótenshe jaǵdaılardy joıý qaýipti, sonyń saldarynan jeke quram arasynda adam shyǵyny bolyp turady. Adamdardy qutqarý úshin óz janyn qıǵan azamattyq qorǵanys organdary qyzmetkerleriniń esimi máńgilik. Mundaı batyrlardy tek týǵandary, jaqyndary, áriptesteri ǵana emes ómirin aman alyp qalǵan jandar da qashanda este saqtaıdy.

Almatynyń órtke qarsy qyzmetiniń tarıhyndaǵy eń iri zilzala 1989 jyldyń 20 mamyrynda bolǵan sumdyq oqıǵa. ​Ol kezde Almaty-II temirjol stansııasynyń kire beris joldarynda suıytylǵan gaz jáne jıhaz ben boıaý tıegen eki teplovoz soqtyǵysqan bolatyn. О́rtti sóndirý jáne TJ zardaptaryn joıýda   9 órt sóndirýshi qyzmettik mindetin oryndaý kezinde kóz jumdy. Esimderin atap turyp eske alaıyq, olar:

- ​ Sharıpov Frıd Abdýluly,

- Aqulov Quralhan,

-​ Safargalıev Ilshat Fırdaýsuly,

-​ ​Nıkýlenko Vladımır Vasılevıch,

-​ ​Abdranov Islam Ábenuly,

-​ ​Qasymov Rasýl Álimjanuly,

-​ ​Malıkov Mıhaıl Ivanovıch,

-​ ​Alımtaev Seıl Qudashuly,

-​ ​Ysqaqov Erkin Qabjaparuly

Sol bir qaıǵyly oqıǵa bolǵan kúni jigitterdiń barlyǵy erlikpen kúresip, apattyń aldyn aldy. О́rt sóndirýshilerdiń biliktiligi arqasynda suıytylǵan gaz bar ózge sısternalar jarylmady jáne órt turǵyn jaıǵa taramady.

Almaty garnızony 1990 jyldyń​ 3 qańtarynda taǵy bir qyzmetkerinen aıryldy. Ishki qyzmet serjanty Balabek Ahmedov qyzmettik mindetin oryndaý kezinde qaıtys boldy, al 2002 jyly ishki qyzmettiń praporshıgi Pavel Golıadkın Medeý aýdanynda órt sóndirý kezinde kóz jumdy.

Dástúr boıynsha saltanatty sharanyń sońy sherýlik sapqa jáne eskertkishterge gúl shoqtaryn qoıýǵa ulasty.