Almatylyq analar ańsaǵan baspanalaryna qol jetkizdi

Almatyda «Alataý Baqytty otbasy» ortalyǵynyń ǵımaratynda qala ákimi Baqytjan Saǵyntaev «Nurly jer» memlekettik turǵyn úı qurylysy baǵdarlamasy boıynsha salynǵan úıden páter kiltterin tapsyrdy.

Baspanaly bolǵandar arasynda úı sharýasyndaǵy áıelder, muǵalimder, kommýnaldyq kásiporyndardyń qyzmetkerleri, kásipkerler bar. Bulardyń barlyǵy úı kezegin birneshe jyl boıy kútken kópbalaly analar.

Jalpy, jyl basynan beri qaraı kezekte turǵandar arasynda kópbalaly otbasylar sanatyna jatatyndarǵa júzden astam páterler bólindi. Bulardan ózge, qalalyq «Baqytty otbasy» baǵdarlamasy boıynsha berilgen turǵyn úı sertıfıkattarynyń kómegimen kópbalaly otbasylar 284 páter aldy. «Baqytty otbasy» respýblıkalyq baǵdarlamasy boıynsha qazirgi kezde 201 otbasy «Turǵynúıqurylysjınaq bankiniń» oń sheshimine ıe boldy, sonyń ishinde kópbalaly otbasylar bar.

«Barlyq aýdandarda jumyssyz analardy mamandyqqa úıretetin, eńbekpen qamtıtyn jáne qajetti zańnamalyq kómek kórsetetin «Baqytty otbasy» ortalyqtary ashylǵan. Qala budan bylaı da áıelderdiń ózderin damytýlary, balalarǵa laıyqty tárbıe berýleri úshin barlyq jaǵdaılardy jasaıtyn bolady», – dep atap ótti B. Saǵyntaev.

Jalpy, qalanyń turǵyn úı saıasaty basqarmasynyń aqparaty boıynsha búgingi kúni turǵyn úıge zárý 25 myń azamat kezekte tur, olardyń 1847-i kópbalaly otbasylar.

Sońǵy úsh jyl ishinde turǵyn úıge muqtaj jandarǵa 9 myńnan astam páter bólindi, olardyń 700-ge jýyǵy kópbalaly analarǵa berildi.