Nazarbaev: "Nur Otan" halyqty mazalaıtyn máselelerge aralaspaıdy

Elordada Elbasynyń tóraǵalyǵymen úkimet músheleriniń, «Nur Otan» partııasynyń jáne onyń Májilistegi fraksııasynyń qatysýymen jınalys ótti.  

Jınalys barysynda N.Nazarbaev depýtattardyń aımaqtarǵa jumys saparlarynyń formatyn qaıta qaraýdy jáne partııanyń qoǵamdyq qabyldaý bólmelerinde alǵashqy kóshbasshylardyń azamattarmen kezdesýlerin ótkizý jumystaryn jandandyrýdy tapsyrdy.

"Zertteý nátıjesi "Nur Otan" partııasy depýtattarynyń buqaralyq aqparat quraldaryn jetkilikti qoldanbaıtynyn kórsetti. Sondaı-aq,  partııa halyqty mazalaıtyn máselelerge asa aralasa bermeıdi. Sońǵy birneshe aıda partııa músheleri atyshýly birde-bir jaǵdaıǵa qatysty óz pikirin bildirmedi", – dedi Qazaqstannyń Tuńǵysh Prezıdenti.

Sonymen qatar, Elbasy fraksııa prosesinde bıýrokratııa men keshendi úılestirý prosedýralaryn alyp tastaý qajettigin aıtty.  Odan ózge Nazarbaev partııa organdaryna partııalyq baqylaý komıteti men sybaılas jemqorlyqqa qarsy is-qımyl jónindegi respýblıkalyq qoǵamdyq keńestiń jumysyn jandandyrýdy tapsyrdy.

"Bul organdarǵa kiretin depýtattar óz jumysyna belsendi isteýi kerek. Sizder jedel suraqtardy syndarly túrde qoıyp, naqty sheshimder usynyp, oǵan bizdiń jurtshylyq qatysýy kerek", – dedi partııa tóraǵasy.

Sonymen birge, Qazaqstannyń Tuńǵysh Prezıdenti fraksııa depýtattary ózderine el Konstıtýsııasy senip tapsyrǵan zańnamalyq bastamany is júzinde qoldana almaıtyndyǵyn atap ótti.

"Depýtattar –  partııanyń tiregi, belsendi elektorattyń negizi. Halyq sizge tıisti bılikti partııa arqyly berdi. Azamattarymyzdyń máselelerin sheshý úshin jumys jasaýlaryńyz kerek", – dedi Elbasy.

Sóz sońynda Nursultan Nazarbaev partııanyń saıası kóshbasshylyǵyn saqtaýdyń mańyzdylyǵyn atap ótti.

"Bizdiń basty mindetimiz –  turaqtylyqty saqtaý. Qazaqstannyń órkendeýi men qarapaıym azamattardyń ál-aýqatyn jaqsartýǵa úles qosý. Sondyqtan ýádelerimizdi oryndaý úshin bar kúshimizdi salý kerek", – dep túıindedi partııa tóraǵasy.