Sarapshylar joldaýdyń júzege asyrylýyn talqylady

ShQO Kókpekti aýdanynda dóńgelek ústel uıymdastyrylyp, memleket basshysy Qasym-Jomart Toqaevtyń joldaýynda aıtylǵan negizgi baǵyttar talqylandy.

QR prezıdenti janyndaǵy Ulttyq qoǵamdyq senim keńesiniń múshesi, belgili saıasattanýshy Erlan Saırov joldaýda aıtylǵan basym baǵyttardy atap ótti. Onyń ishinde shekaralyq aýdandardyń damýy, kópbalaly analardy baspanamen qamtamasyz etý, jastarǵa sapaly bilim berý, adamı kapıtaldy damytý bar.

– Prezıdenttiń joldaýy aımaqtardy órkendetýge baǵyttalǵan. Qazaqstan turǵyndarynyń 42 paıyzy aýyl-aımaqtarda turady. Sondyqtan aýyldardaǵy áleýmettik jaǵdaıdy jaqsartý úshin ekonomıkalyq jáne qarjylyq ınfraqurylymdy damytý maqsatynda atqarylatyn jumystar legi kóp. Bul – qazaqstandyq kapıtal úshin asa mańyzdy. Sol sebepten biz aýyl turǵyndarynyń jaǵdaıyn jalpyrespýblıkalyq deńgeıge jetkizýimiz qajet. Sonda aýylda turamyn deýshilerdiń qatary artady. Bul suraqtar Ulttyq keńeste qaraldy. Aýyl sharýashylyǵyn damytý maqsatynda ártúrli jumystar qolǵa alynýda, – deı kele – Prezıdent joldaýynda pedagogtardyń statýsyn kóterý týraly aıtylǵan. О́ıtkeni bolashaq urpaqty tárbıeleıtin ustazdar qaýymyna jaǵdaı jasalýy tıis.

Dóńgelek ústelge qoǵamdastyqtardyń ókilderi, memlekettik organdar, bıznesmender qatysyp, Qasym-Jomart Toqaevtyń joldaýdy qoǵamnyń talabyna sáıkes keletinin, sondaı-aq el turǵyndarynyń turmys-tirshiligin sapaly etýge baǵyttalǵanyn atap ótti.

Erlan Saırov aýyl turǵyndaryna shaǵyn jáne orta bıznesti damytý, aýyldaǵy máselelerdi sheshýdiń joldary týraly keńinen túsindirip berdi. Sondaı-aq Erlan Saırov aýyl turǵyndaryna áleýmettik qoldaý kórsetiletinin atap ótti.