Keshki segizden keıin shýlasań, aıyppul tóleýiń múmkin

Densaýlyq saqtaý mınıstrligi keshki 20.00-den tańǵy 09.00-ge deıin tynyshtyqty buzýǵa tyıym salýdy usynyp otyr dep habarlaıdy Qamshy.kz aqparat agenttigi Sputnik Qazaqstan  saıtyna silteme jasap.

"Tynyshtyqty buzý týraly 437-bap qaıta qaraldy. Qazirgi 23.00-den tańǵy 06.00-ge deıingi ýaqytty 20.00-den tańǵy 09.00-ge deıin ózgertý usynylyp otyr", - delingen densaýlyq saqtaý mınıstri Eljan Birtanovtyń "Halyq densaýlyǵy jáne densaýlyq saqtaý júıesi týraly" kodeks jobasy jaıly baıandamasynda.

Sondaı-aq, zań jobasynda turǵyn úı ǵımarattarynda jáne turǵyn úı qurylysy aýmaǵynda ornalasqan oıyn-saýyq mekemelerine jumys kúnderi keshki 22.00-den tańǵy 06.00-ge deıin, al demalys jáne mereke kúnderi keshki 23.00-den tańǵy 10.00-ge deıin tynyshtyqty buzýǵa tyıym salý kózdelgen.

Ákimshilik quqyq buzýshylyq týraly kodekstiń 437-babyna sáıkes, tynyshtyqty buzǵany úshin jeke tulǵalarǵa – 5 AEK (12 625 teńge), shaǵyn kásipkerlik sýbektilerine – 10 AEK (25 250 teńge), orta kásipkerlik sýbektilerine – 15 AEK (37 875 teńge), iri kásipkerlik sýbektilerine 50 AEK (126 250 teńge) aıyppul salynady.

Eger ákimshilik jazadan keıin, zań buzýshylyq bir jyl ishinde taǵy qaıtalansa, onda aıyppul somasy eki eselenedi.