Aımaǵanbetov: Bilim jáne ǵylym mınıstrligi qaıta qurylady

QR Bilim jáne ǵylym mınıstri Ashat Aımaǵambetov mınıstrlik qaıta qurylatynyn jarııalady dep habarlaıdy Qamshy.kz aqparat agenttigi mınıstrdiń Facebook jelisindegi paraqshasyna silteme jasap. 

Mınıstrlik jumysynyń tıimdiligin arttyrý - mańyzdy másele. Bul -ishki bıznes-prosesterdi retteý, keıbir fýnksııalardyń qaıtalanýyn boldyrmaý, ár qyzmetkerge naqty mindetter júkteý, bólimshelerdiń jumysyn ońtaılandyrý men olardyń úılesimdi jumysyn qamtamasyz etý jáne t. b.
Biz mınıstrlik jumysyna fýnksıonaldyq taldaý júrgizdik. Biraz máseleler ózgeristerdi qajet etetindigi anyqtaldy.

Máselen, negizgi bólimshelerdiń jumysynda basty nazar strategııalyq basymdylyqtardy anyqtap, bilim berý saıasatyn belgileýge emes, aǵymdaǵy operasııalyq-sharýashylyq jumystarǵa aýdarylǵan.

Mektepke deıingi jáne orta bilim berý, TjKB jáne joǵary jáne joǵary oqý ornynan keıingi bilim berý sekildi negizgi departamentter ózderine tán emes qyzmet atqarady.

Atap aıtqanda konkýrstyq rásimderdi júrgizý, memlekettik satyp alýlardyń tehnıkalyq sıpattamalaryn ázirleý, atqarylǵan jumystardyń esebin qabyldaý, aktilerge qol qoıý, bıýdjettik ótinimderdi jasaý jáne t.s.

Sóıte tura, normatıvti qujattarmen jumys isteý jáne óz salasyndaǵy jumysty úılestirý sııaqty basty mindetterine qajetti deńgeıde kóńil bólinbeı keledi.

Birqatar qyzmetkerler men bólimshelerde fýnksııalardyń qaıtalanýy men qarama-qaıshylyqtar anyqtaldy.

Qurylymdyq bólimshelerdiń júktemelerin taldaý da osyndaı sáıkessizdikterdiń kóp ekendigin kórsetti. Joǵary jáne joǵary oqý ornynan keıingi bilim berý departamentiniń bir qyzmetkeriniń júktemesi basqa servıstik departamenttegiden 7 ese artyq.

Osy jáne basqa da máselelerdi sheshý úshin mınıstrliktiń qurylymynda birqatar ózgerister oryn almaq.

Endi memlekettik satyp alý, oryndalǵan jumystardyń aktilerin qabyldaý, bıýdjetti ıgerý, tehnıkalyq sıpattamalardy jasaý sııaqty barlyq mindetter qarjy departamentine júkteledi. Bıýdjettik ótinimderdi ázirleý máselelerimen aldaǵy ýaqytta Bıýdjettik josparlaý departamenti aınalysady.

Vıse-mınıstrler men salalyq departamentter tek ǵana óz baǵyttary boıynsha memlekettik saıasatty qalyptastyrýmen, osy salalardaǵy qyzmetti quqyqtyq qamtamasyz etýmen jáne úılestirýmen aınalysady.

Bilim jáne ǵylym salasyndaǵy baqylaý komıteti Sapany qamtamasyz etý jónindegi komıtet bolyp qaıta qurylady. Demek Komıtettiń mıssııasy men mindetteri de ózgeredi. Endigi mindet - tártip buzýshylyqty tekserý men anyqtaý ǵana emes, sonymen birge ádistemelik kómek kórsetý. О́ıtkeni, maqsatymyz - tekserý emes, sondyqtan Komıtet qandaı synypta, qandaı taqyryp boıynsha, qaı jerde kemshin tus, túıtkildi jerler bar ekenin kórsetip, osy máseleni sheshý úshin egjeı-tegjeıli usynystar beretin bolady.

Mektepke deıingi jáne orta bilim departamenti qyzmetkerleriniń sany basqa bólimshelerdiń jumyskerleriniń esebinen artyp, Mektepke deıingi jáne orta bilim komıteti bolyp qurylady.

Bul rette mınıstrliktiń jalpy shtat sany artpaıdy, onyń ústine bos jumys oryndary esebinen biraz qysqartý josparlanyp otyr.

Mınıstrlik qyzmetkerlerdiń biliktiligin arttyrý jáne oqytý arqyly jumyskerlerdiń áleýetin kúsheıtý jónindegi jeke baǵdarlama bekitýdemiz. Kýrstarǵa jáne magıstratýrada oqytýǵa jiberý jónindegi maqsatty baǵdarlama daıyndalýda.

О́zgerister ádette adamdardy jaıly orynnan qozǵaıtyny belgili.
Degenmen, bıznes-úderisteri, laýazymdyq nusqaýlyqtar jáne árbir bólimshe men qyzmetkerdiń fýnksıonaly naqty aıqyndalyp, negizgi basymdyqtar men mindetterdiń durys qoıylýyna, óz kezeginde jumysymyzdyń tıimdiligin arttyrýǵa múmkindik beretindigine senimdimin" delingen jazbada.