Tátti túbirden mol tabys kútedi

Jambyl oblysynda qyzylsha alqabyn ulǵaıtý boıynsha birqatar júıeli jumystar atqaryldy. Aldyńǵy jyldary úzdik sharýa qojalyqtardyń jumysymen jeke tanysyp, ozyq tehnolgııalardy meńgerý, búgingi zaman talabyna saı tyńaıtqyshtardy tıimdi paıdalanýdy kózben kórsetip, qolmen ustatatyn úlken basqosý da uıymdastyrylǵan edi. Sol jumystardyń naqty nátıjemen ushtasqandyǵyna tátti túbir jınap jatqan dıqandardyń eńbegi dálel bolyp otyr.

Tátti túbir ósirýde aldyńǵy qatarda kele jatqan aýdandardyń biri – toǵyz joldyń torabyndaǵy Shý aýdany. Munda bıyldan bastap qant qyzylshasyn egýdi qolǵa alǵan irgeli seriktestikterdiń biri – «Qyzylsha» JShS.

«Aýdanǵa qant qyzylshasyn egý úshin byltyr kúzde 300 gektar jerdi daıyndadyq. Maýsymdyq jumys kezinde 40-qa jýyq ınjener, operator, agronomdar men aýylsharýashylyǵy maqsatyndaǵy 20 tehnıka tynymsyz eńbek etti. Bunyń bári qurylys jumystary áne-mine bastalatyn qant zaýytyn shıkizatpen qamtýdyń qamy. Al, zaýyt paıdalanýǵa berilgenge deıin shıkizatty Merki aýdanyndaǵy qant zaýytyna ótkeretin bolamyz. Bıylǵy jyldyń ónimdiligi oıdaǵydaı boldy. Kelesi jyly qant qyzylshasy alqabyn 1000 gektarǵa deıin ulǵaıtýdy kózdep otyrmyz. Qazir jerdi kóktemgi jumystarǵa daıyndaý jumystary júrgizilýde» - deıdi «Qyzylsha» JShS-niń óndiristik dırektory Baǵdat Belgibaev.

Qant qyzylshasyn egý jumystaryn sáýir aıynyń basynda bastaǵan seriktestik búgingi kúni 306 gektar jerdi tolyǵymen ıgergen. Olar 300 gektarǵa nemistiń «akasııa» jáne «vıorıka» syndy tuqymyn egip, qalǵan 6 gektar aýmaqqa ózderiniń zerthanasy úshin ózge de tuqymdardy egipti. Atalmysh seriktestiktiń qurylǵanyna kóp ýaqyt bolmasa da, olardyń materıaldyq-tehnıkalyq áleýetteri úlken. Qazir munda 300 gektar jerdegi qant qyzylshasyn jınaý jumystary bastalyp ketti. Búgingi tańda 20 gektar jerdegi shıkizat jınalǵan bolsa, qarasha aıynyń 15-ne deıin bul jumystar tolyq aıaqtalmaq. Bul maqsatta dál qazir 25 adam men 10-nan asa tehnıka tynbaı eńbek etýde.

«Qyzylsha» jaýapkershiligi shekteýli seriktestigi 300 gektar alqaptan bólek, 2 gektar aýmaqqa qant qyzylshasynyń 12 túrli surpyn seýipti. Bıylǵy jyldyń kórsetkishi boıynsha 123 gektar jerge egilgen nemistiń «Vıorıka» tuqymy mol ónim berse, 80 gektar jerdegi «Akasııa» dep atalatyn túriniń ónimdiligi tómen bolyp turǵan kórinedi. Al aýdan ákiminiń orynbasary Álıhan Balqybekovtyń aıtýynsha, jalpy aýdan sharýalary qazan aıynyń 10-nan bastap jappaı jıyn-terin jumystaryn bastap ketken.

– Bıyl aýdan boıynsha 725 gektar alqapqa qant qyzylshasy sebilgen bolatyn. Onyń ishinde 465 gektary ǵana saqtalyp otyr. Qazirgi kezde Eski-Shý, Qonaev jáne Dýlat aýyldyq okrýgterindegi jıyn-terin jumystary óz deńgeıinde júrip jatyr. Túsimi de jaman emes. Sonymen birge, «Qyzylsha» JShS bıyldan bastap qant zaýytynyń qurylysyn bastamaq. Sol sebepti, kelesi jyly aýdan sharýalary tabysy kól-kósir qant qyzylshasyn kóptep egip, aýdanymyzdyń atyn alysqa shyǵarady degen senimdemin, - deıdi Álıhan Ábiláshuly.