Elektrondy kitap kóp kádege jaraıdy

Taraz qalasynda «Rýhanı jańǵyrý» baǵdarlamasy negizinde «Qundy ólketaný qujattaryn sıfrlaý» jobasy qol alyndy. Joba aıasynda jergilikti avtorlardyń shyǵarmalary men kitaphana qoryndaǵy birqatar kitaptardyń sıfrly nusqaǵa aýysyp, oqyrman suranysyn elektrondy formatta óteýge kóshti, dep jazady Qamshy.kz aqparat agenttigi.  

Jastarǵa ólke tarıhyn tanytýdy maqsat etken jobaǵa saı 18 jergilikti avtormen kelisim-sharttar jasaldy. Bul kelisimge kelgen shyǵarmashyl jandardyń 56 atalymmen jaryq kórgen 810 dana kitaby sıfrly formatqa aýystyryldy. Mundaǵy 37 ataýymen jaryq kórgen 688 dana memlekettik tilde. Jasampaz, jańashyl joba aıasynda sıfrly formatqa kóshirilgen kitaptardyń barlyǵy da kitaphananyń derekqoryna engizildi.

Jambyl oblystyq tarıhı-ólketaný murajaıynda da «Qundy ólketaný qujattaryn sıfrlaý» sátti júzege asyrylyp keledi. Maqsatty júrgizilgen jumystar nátıjesinde aǵymdaǵy jyly «Fotoarhıv» derek qoryna 623 fotoqujat engizildi.

Jalpy óńirde qundy málimetterdi elektrondyq formatqa kóshirý jumystary qarqyndy júrgizilip keledi. «Sıfrly Qazaqstan» memlekettik baǵdarlamasynan týyndaǵan bul jaýapty mindetterge saı 2020 jylǵa deıin barlyq qazaqstandyq avtorlardyń kitaptary sıfrlyq formatqa kóshirilmek. Sáıkesinshe óńirdegi kitaphanalardyń paıdalaný aýqymyn keńeıtý jumystary keńeıe tústi. Endigi jerde oblys aýmaǵyndaǵy kitaphanalar oqyrmandardyń suranysyn ótep qana qoımaıdy. Olarǵa jergilikti turǵyndarǵa sıfrlyq-aqparattyq qyzmet usyný jaýapkershiligi qosa júktelmek. Kezeń-kezeńimen oblystaǵy 274 memlekettik kitaphana óńir turǵyndaryna jańa formatta qyzmet kórsete bastaıdy. 2018 jyldan beri osy maqsatta oblystaǵy 130 kitaphana janynan sıfrlandyrylǵan aqparattyq jáne kovorkıng ortalyqtary ashylǵan. Mundaǵy 18 nysan kovorkıng, al nysan 112 - sıfrlandyrylǵan aqparattyq ortalyq etip jabdyqtaldy. Oblys ortalyǵynan shalǵaı eldi mekenderde qurylǵan 107 sıfrlandyrylǵan aqparattyq ortalyq ınternetke qol jetkize almaı otyrǵan óńir turǵyndarynyń kádesine jarap keledi. Olardyń keıbiri «Elektrondy úkimet» júıesimen birqatar memlekettik qyzmet túrlerin usynady. Oblysta jyl sońyna deıin osyndaı 19 sıfrlandyrylǵan aqparat ortalyǵy ashylmaq.