Bilim berý salasyndaǵy memlekettik qyzmetter onlaın rejımde qol jetimdi bola tústi

Zaman aǵymymen qoǵam ómiriniń barlyq salasyna óz septigin tıgizgen sıfrlandyrý úderisinen Jambyl oblysyndaǵy bilim berý uıymdary da shet qalmady. Nátıjesinde óńirdegi balabaqshalarǵa balalardy kezekke qoıý, joldama alýǵa, mekteptiń 1-synybyna qabyldaý, jazǵy saýyqtyrý jáne demalys lagerlerine joldama berý tehnıkalyq jáne kásiptik bilim berý mekemelerine oqýǵa túsý jumystary tolyǵymen avtomattandyryldy. Endigi kezekte ata-analar úshin balalaryn bilim berý uıymdaryna ornalastyrýda olardyń tabaldyryǵyn tozdyrýdyń qajeti shamaly. Qujat qabyldaý júıesi tolyǵymen «Elektrondy Úkimet» portalynda júrgizilýde, dep jazady Qamshy.kz aqparat agenttigi. 

Búginde oblystaǵy barlyq bilim berý uıymdary biryńǵaı sandyq júıege qosylǵan. Sonyń esebinen jambyldyq búldirshinderdi balabaqshaǵa kezekke qoıý jáne joldama alý jumystary edugarden.kz saıty arqyly júrgizile bastady. Al balalardy mektepke 1 synypqa qabyldaý jáne jazǵy saýyqtyrý jáne demalys lagerlerine joldama berý eduschool.kz saıtynda iske asýda. Bilim basqarmasyna qarasty tehnıkalyq jáne kásiptik bilim berý mekemelerine stýdent qabyldaý zhambyltipo.kz saıty arqyly júrgiziledi.

–Búginde bilim salasy boıynsha 37 memlekettik qyzmet kórsetilse, taǵy 15-i avtomattandyrylǵan rejımde qoljetimdi bola tústi. Jyl sońyna deıin taǵy 13 memlekettik qyzmet túri elektrondy rejımge aýysady. Osylaısha jyl sońyna deıin bilim salasynda kórsetiletin memlekettik qyzmettiń 75,6 paıyzy avtomattandyrylmaq, –deıdi oblys ákimdiginiń bilim basqarmasynyń basshysy Rahııa Turmaǵanbetova.

Sáıkesinshe aǵymdaǵy oqý jylynda mektepke 1 synypqa qabyldaý týraly 25100 ótinish elektrondy túrde berildi. Sondaı-aq 27091 balaǵa qala syrtyndaǵy jáne mektep janyndaǵy lagerlerge joldama elektrondy bazaǵa túsken ótinishine saı berildi.

Bilim berý salasynda kórsetiletin qyzmetterdi sıfrlandyrýmen birge jambyldyq mektepterde oqýshylardyń sıfrlyq saýattylyǵyn arttyrýǵa den qoıylǵan. О́tken jyly Taraz qalasy men aýdandar 14 IT synyby ashylsa, bıyl jyly 24 IT synyp ashyldy. Sonymen qatar oblys mektepteriniń 52.26 paıyzy robototehnıka kabınetterimen jabdyqtaldy.