Sańlaqtardyń sara joly

Búginde Jambyl oblysyndaǵy Qordaı aýdanynda buqaralyq sporttyń damytý baǵytynda tyń bastamalar kóterilýde. Jańa nysandar paıdalanýǵa berilip, jastar arasynda túrli jarystar ótkizilýde. Bul, árıne, Elbasy saıasatynyń nátıjesi ekendigi sózsiz. Osy oraıda qutty Qordaı jerinde týyp ósip, elimizdiń namysyn álemdik, halyqaralyq jarystarda abyroımen qorǵap júrgen jalyndy jastardyń esimderin aıta ketkenniń artyqtyǵy joq.

2018 jyly 1-3 aqpan aralyǵynda Iran memleketindiń Tegeran qalasynda ótken jeńil atletıkadan XXIII Azııa chempıonatynda Svetlana Golendova 4h100 metr estafetalyq júgirýden jáne jekeleı júgirýden birinshi oryn jáne tamyz aıynda Indonezııa memleketiniń Djakarta qalasynda ótken jeńil atletıkadan Azııa oıyndarynda júldeli úshinshi oryndy ıelengen.

Sonymen qatar Reseı Federasııasy Anapa qalasynda kıkboksıngtan ótken Álem kýbogy jarysynda Beısenbek Maqsat kúmis júldeni, Aıdyn Turdybekov qola medaldi jeńip alyp, Qordaı ǵana emes Qazaqstannyń mártebesin kóterip tastady.

Sondaı-aq maýsym aıynda oblys ortalyǵynda ótken tirek-qımyl apparaty zaqymdanǵan jáne kórý qabileti tómen múmkindigi shekteýli sportshylar arasynda Qazaqstannyń besinshi Spartakıadasyna Jambyl oblysynyń irikteý jarysynda toǵyzqumalaqtan Shamıl Rıshat bas júldeni jeńip alǵan. Al jalpy aýdan boıynsha jekeleı turǵydaǵy jetistikter týraly sóz etkende tómendegi sportshylardyń aty-jónderin alǵa tartýǵa bolady. Qazaqstanyń jepke-jek sport túrinen bes dúrkin chempıony, pankratıonnan álem chempıony, ONE FC jekpe-jeginen álem chempıony, kóptegen halyqaralyq jarystardyń jeńimpazy, Qordaı aýdany Qarasý aýylynda dúnıege kelgen Igor Svırıd, pankratıonnan álem chempıony, kıkboksıngtan halyqaralyq dárejedegi sport sheberi, Qazaqstanyń pankratıonan úsh dúrkin chempıony, qolmen kúres sport túrinen halyqaralyq dárejedegi sport sheberi, Qordaı aýdany Qordaı aýylynda týǵan Saǵyn Qazbek, Álem kýbogynyń ıegeri, pankratıonnan halyqaralyq dárejedegi sport sheberi, alty dúrkin Qazaqstan chempıony, qazirgi tańda kásipqoı boksta úsh kezdesý ótkizip, úsheýinde de jeńiske jetken, Qordaı aýdany Aýhatty aýylynyń týmasy Ashat Jantursynov, taǵy da basqa kóptegen sańlaqtardy qordaılyqtar aıryqsha maqtan tutady.