Jambyldaǵy kitaphanalarda sıfrlyq ortalyqtar kóptep ashylýda

Elbasy N.Nazarbaevtyń bastamasymen qolǵa alynǵan «Sıfrly Qazaqstan» baǵdarlamasy búginde qoǵamnyń barlyq salasynda dendep qoldanysqa ene bastady. Sol qatarda kitaphanalar júıesi de jańa tehnologııalardyń ıgiligin kórip, oń ózgeristerge bet burýda. Osy oraıda Jambyl oblysyndaǵy rýhanııat oshaqtary da zaman talabyna beıimdelip keledi.

Sh.Ýálıhanov atyndaǵy Jambyl oblystyq ǵylymı-ámbebap kitaphanasynyń dırektory Elmıra Ábdınovanyń aıtýynsha, jergilikti jerdegi kitaphanalarda sıfrlandyrylǵan ortalyqtar ashý isi qarqyndy júrgizilýde.

–Keıingi jyldary kitaphanalardy jańa tehnologııalarmen jaraqtandyra otyryp, jurtshylyqtyń ıgiligine jaratýǵa basymdyq berilýde. Bul turǵyda oblys ákimi Asqar Myrzahmetovtiń bastamasymen kóptegen jumystar atqarylýda. О́tken jyldan bastap aǵymdaǵy 8 aıdyń ishinde oblys kitaphanalarynan 130 sıfrlandyrylǵan aqparattyq jáne kovorkıng ortalyqtary ashylǵan. Sol 130 ortalyqtyń 18 –i kovorkıng, 112 –si sıfrlandyrylǵan aqparattyq ortalyq. 112 sıfrlandyrylǵan aqparattyq ortalyqtyń beseýi Taraz qalasynda ornalasqan kitaphanalardyń janynan ashylsa, qalǵan 107-si – aýdandardaǵy 91 aýyldyq okrýgty qamtyp otyr.

53 sıfrlandyrylǵan aqparattyq ortalyq 2018 jyly, 59-y osy jyldyń 8 aıynda ashyldy.

Sonymen qatar, bıylǵy jyldyń sońyna deıin josparǵa sáıkes 19 okrýgte 20 ortalyq iske qosylady, jáne, qosymsha 17 aýyldyq okrýgtegi 19 kitaphanada osyndaı ortalyqtar ashý múmkindigi bar. Bul baǵytta júıeli jumystar júrgizilýde,-deıdi Shoqan Ýálıhanov atyndaǵy oblystyq ámbebap ǵylymı kitaphanasynyń dırektory Elmıra Abdınova. Sondaı-aq búgingi tańda ortalyq qyzmetkerleri http://zhambyl.cao-zhambyl.kz saıty arqyly jergilikti turǵyndardy aýyl, aýdan, oblystyń qoǵamdyq, mádenı, ekonomıkalyq, áleýmettik ómiri aıasynda jan-jaqty aqparatpen qamtamasyz etý múmkindigine ıe bolyp otyr.

Sh. Ýálıhanov atyndaǵy oblystyq ámbebap ǵylymı kitaphanasynyń kitaphanany damytý bóliminiń meńgerýshisi Janat Jetpisbaevanyń aıtýynsha, búginde jalpy 112 sıfrlandyrylǵan aqparattyq ortalyqty paıdalanýshylar sany - 85662 adamǵa jetken.

Mine, osylaısha «Sıfrly Qazaqstan» baǵdarlamasynyń jemisin kitaphanalar da aıqyn sezinýde.