Qorǵanys mınıstrligi: kózi men qolynan aıyrylǵan sarbaz qaýipsizdik talaptaryn oryndamaǵan

Qorǵanys mınıstrligi "Beket-Ata" polıgonynda bolǵan jaǵdaıǵa qatysty túsinikteme berdi. Qazaqstan Qarýly kúshteri bas shtabynyń orynbasary, general-maıor Ádilbek Aldabergenov oqıǵanyń sebebi men barysyn baıandady.

Qazaqstan Qarýly kúshteri bas shtabynyń orynbasarynyń aıtýynsha, Koshelev granatanyń jarylǵysh muryndyǵyn tartyp, tetigin iske qosqan. Al dybysyn estigennen keıin radıostansııanyń astyna salǵan. 

"Qoldaǵy bar málimetimiz boıynsha 2019 jyldyń 17 shildesinde ótkizetin sabaq kestesine sáıkes, "Beket-Ata" oqý-jattyǵý polıgonynda jeke qurammen arnaıy oqý-jattyǵý ótkizildi. Baılanysshy, merzimdi qyzmettegi qatardaǵy jaýynger Koshelev baılanysshylarǵa jabdyqty kórsetý úshin oqý-jattyǵýǵa tartylǵan bolatyn. Eshqandaı jaýyngerlik tapsyrmany oryndaýy tıis emes edi. Sabaqqa daıarlyq júrgizý kezinde Koshelev buıryqsyz oq-dárige jaqyndap, F-1 granatasyn qolyna aldy", - deıdi Aldabergenov.

Alaıda beıneleý polıgonynda jarymjan bolyp qalǵan sarbaz Sergeı Koshelev bul aıtylǵandarmen kelispeıdi. Onyń sózinshe, oqý-jattyǵý jasaıtyn jerde granata ashyqtan-ashyq qaraýsyz jatqandyqtan, ol ony oqý quralymen shatastyrǵan.

"Koshelevpen birge boryshyn ótep júrgenderdiń aıtýynsha, jaýyngerlik granata ekeni eskertilgen. Jarylys saldarynan radıostansııa mańyndaǵy qatardaǵy jaýyngerler Koshelev pen Jamanbaev jaraqat aldy. Jaqyn mańdaǵy basqa áskerı qyzmetshiler zardap shekpegenmen, olarǵa da qaýip tóngen. Zardap shekken Koshelev pen Jamanbaevqa barlyq qajetti medısınalyq jáne psıhologııalyq kómek kórsetildi", - dedi general-maıor.

Qorǵanys mınıstri Nurlan Ermekbaev ta máselege baılanysty pikirin bildirdi. Mınıstrdiń sózinshe, qaralyp jatqan boljamdardyń biri – áskerı qyzmetshiniń qaýipsizdik talaptaryn buzýy.

Mınıstr eger bul boljam dáleldense, áskerı bólimniń sarbazdan keltirilgen shyǵyndy qaıtarýdy talap etýge quqyǵy bar. Ermekbaev bul másele tergeý aıaqtalǵannan keıin naqty qaralatynyn aıtty.

Eske sala ketsek, oqıǵa osy jyldyń 17 shildesinde bolǵan edi. Mańǵystaý oblysyndaǵy polıgonda ótken oqý-jattyǵý kezinde granata jarylyp, № 99116 áskerı bólimniń eki sarbazy zardap shekti. Koshelev qoly men kózinen aıyryldy. Ekinshi sarbaz Beıbarys Jamanbaevtyń anasy prezıdentke hat jazyp, osy oqıǵany jeke baqylaýǵa alýdy suraǵan bolatyn.