"Janam degen júrekke ot beremin..."

Jastar - el tiregi. Sondyqtan da óskeleń urpaqtyń tulǵa bolyp qalyptasýy jolynda memleket tarapynan laıyqty qamqorlyq jasalyp keledi. Elbasynyń bıylǵy jyldy Jastar jyly dep jarııalaýy da osy sózimizdiń naqty bir dáleli.

Qazirgi tańda Jambyl oblysynda bul baǵytta baǵdarly tirlikter júıesin taýyp, oń nátıjesin berýde. Olardyń qatarynda bilim berý, densaýlyq saqtaý, quqyq qorǵaý, mádenıet, sport salalarynda júzege asyp jatqan aýqymdy jumystar týraly aýyz toltyryp aıtýǵa bolady. Bul qatarda «Máńgilik el jastary ındýstrııaǵa» - «Serpin-2050» baǵdarlamasynyń tıgizip jatqan kómegi kóp.

Atalmysh baǵdarlama aıasynda 2014-2018 jyldar aralyǵynda oblystan 1384 túlek oqýǵa tústi. Onyń 1169-y joǵary oqý oryndarynda, 215-i kolledjderde pedagogıkalyq, tehnıkalyq, tehnologııalyq, aýylsharýashylyǵy, medısınalyq mamandyqtar boıynsha bilim alýda. Osy joba aıasynda 2018 jyly 65 túlek oqýyn bitirip, onyń 31-i jumysqa ornalasty.

Jastarǵa jiger syılaýǵa baǵyttalǵan taǵy bir bastama- ústimizdegi jyldyń 12-14 maýsymy aralyǵynda ótken «2019 - jastardyń ınnovasııalyq áleýeti» «Hakaton «Social Assembly» oblystyq baıqaýy. Baıqaý básekege qabilettilik, bilimniń saltanat qurýy, pragmatızm, sananyń ashyqtyǵy, ulttyq biregeılikti saqtaý jáne evolıýsııalyq damý atty 6 baǵyt boıynsha ótkizilip, joǵary jáne arnaýly orta oqý oryndarynyń stýdentteri men jas zertteýshiler, 14 jastan 17 jasqa deıingi mektep oqýshylary, etnomádenı birlestikterdiń jastar kóshbasshylary qatysty.

Baıqaýda jastardyń naqty áleýmettik máselelerin anyqtaý jáne sheshý joldaryn usyný boıynsha 42 joba tyńdalyp, baıqaý shartyna sáıkes úzdik tańdalǵan 22 jumys júldeli syılyqtarmen marapattaldy.

Sonymen qatar, is-shara baǵdarlamasynda «Jańǵyrý joly» jastar qozǵalysynyń jumysyn aqparattyq ilgeriletý boıynsha dáris jáne seriktes uıymdastyrýshylarmen (akvarıým formatynda) pikirtalas alańy ótkizildi. Jastardy jańa jetistikterge yntalandyrý, maqsat qoıyp, olarǵa qol jetkizý, ınnovasııalyq jáne naqty áleýmettik máselelerdi sheshýge baǵyttalǵan jastar jobalaryn qoldaý arqyly QHA qataryna «jańa esimderdi», baǵdarlamashylardy, startaperlerdi jáne ınnovatorlardy qosýǵa qol jetkizildi. Baıqaý barysynda anyqtalǵan gran-prı ıegerleri R.Mardenova, T.Ibragımov jáne R.Aıtıkenova aldaǵy ýaqytta QHA jumysyna qajetti jobalardy iske asyratyn bolady jáne respýblıkalyq kezeńge óz jobalarymen qatysady.