Sport salasynda serpin bar

Buqaralyq sportty damytý-Elbasy N.Nazarbaev aıqyndap bergen basty basymdyqtardyń biri. Bul turǵyda Jambyl oblysyndaǵy Jambyl aýdanynda da jemisti jumystar jeterlik. Ásirese, 2017 jyldan beri qaraı bul baǵyttaǵy jumystar qarqyn ala túsken. Mysaly, sol jyldyń ózinde aýdanda barlyǵy 151 sporttyq ǵımarat halyqqa qyzmet kórsetti. Onyń ishinde 1 ortalyq stadıon, 1 sport kesheni, 1 ıppodrom, 8 atqyshtar tıri, 77 sport alańshalary, 29 fýtbol alańdary, 33 sport zaldary jáne 1 dene tárbıesi jáne sportpen shuǵyldanatyn bólme eldiń ıgiligine jarady. Bul nysandardyń barlyǵy aýdan aýmaǵyndaǵy eldi mekenderde ornalasqan.

2017 jylǵy málimet boıynsha aýdan kóleminde dene shynyqtyrý jáne sportpen júıeli túrde 22859 adam shuǵyldandy. Bul kórsetkish aýdan turǵyndarynyń jalpy sanyna (81347 adam) eseptegende, 28,1 paıyzdy qurady.

Balalar men jasóspirimderdiń jalpy sanynan balalar men jasóspirimder sport mektepterinde jáne aýla klýbtaryndaǵy dene shynyqtyrýmen jáne sportpen aınalysatyn 7 men 18 jas aralyǵyndaǵy balalar men jasóspirimderdiń qamtylǵany 11,2 paıyzdy mejeledi.

Esepti kezeńde aýdanǵa qarasty Asa aýylyndaǵy balalar men jasóspirimder sport mektebinde 1044 bala sporttyń 12 túrimen shuǵyldandy. Bul balalarmen 31 jattyqtyrýshy-oqytýshy sporttyń qazaq kúresi, dzıý-do, sambo, erkin kúres, boks, jartasqa órmeleý, basketbol, jeńil atletıka, grek-rım kúresi, qusbegilik, voleıbol jáne fýtbol boıynsha jumys jasady.

Jalpy, Túrksib aýylyndaǵy balalar men jasóspirimder sport mektebinde 504 bala sporttyń 6 túrinen jattyǵady, bul balalarmen 16 jattyqtyrýshy-oqytýshy boks, dzıý-do, grek rım kúresi, qazaq kúresi, kıkboksıng, erkin kúres, shahmattan jumys atqarady.

Salamatty ómir saltyn ustaný baǵytynda aýdandaǵy mekeme qyzmetkerleri men aýyl jastary keshki mezgilde aptasyna eki ret aýyldyq okrýg aımaqtaryndaǵy orta mektepterdiń sport zaldarynda voleıbolmen, basketbolmen, aýdan aımaǵyndaǵy eki balalar men jasóspirimder sport mektepteriniń zaldarynda, jastar ortalyǵyndaǵy trenajer zaly men aýyldyq okrýgterdegi kishi fýtbol alańdarynda jattyǵyp otyrady. Bul turǵyda keste boıynsha 17 aýyldyq aımaqtaǵy 48 sporttyq nysandar qyzmet kórsetti. Osy baǵyttaǵy jumystar jyldan jylǵa jandanyp, kórsetkishter de eselenip keledi.