Tilshiler bir kún qutqarýshy boldy

Qutqarýshylar kúni kásibı merekesi qarsańynda Jambyl oblysynyń buqaralyq aqparat quraldary ókilderiniń qatysýymen Taraz qalasy №1 mamandandyrylǵan órt sóndirý bóliminiń aýmaǵynda «О́rt sóndirý kvesti» ótti, dep jazady Qamshy.kz aqparat agenttigi. 

Mundaǵy maqsat tilshiler qaýymyn órt sóndirý kásibiniń qyr-syrymen jete tanystyryp, tájirıbelik turǵyda kórsetý, sondaı-aq ot jaýyngeri ózderiniń qyzmettik mindetterin atqarý barysynda qandaı qıyndyqtarmen betbe-bet kelýi yqtımal ekendigin shaǵyn da bolsa tájirıbemen kórsetý bolyp tabylady.

Atalǵan órt sóndirý bólimniń bastyǵy, azamattyq qorǵaý maıory Asqar Qýanyshbekuly Bazarbaev bastaǵan jeke quram kelgen qonaqtardy yqylaspen kútip alyp, BAQ ókilderine Jambyl oblystyq garnızonynyń maqtaýly bóliminiń jaýyngerlik bólimine ekskýrsııa uıymdastyryldy. Odan ári olar «О́rt sóndirý kvestiniń» «Jıyn jáne dabyl boıynsha shyǵý» bir kezeńine ótti. jaýyngerlik kıimniń standartty jıyntyǵy arnaıy yńǵaıǵa kelitirilip qoıyldy. Mine osylaısha shuǵyl kıip ketýge yńǵaılap qoıylǵan shlem, otqa tózimdi kúrteshe men qalyń shalbarlardyń áp-sátte-aq kıilýiniń syry osynda bolyp tabylady. Al munan soń balta men karabın ilingen belbeý taǵyldy. Mine osymen bári daıyn.

Al tilshi-qutqarýshylar odan ári «Jaýyngerlik qanat jaıý» dep atalatyn ekinshi kezeńine de ótti. Qanat jaıý ádisi ot jaýyngerleri emes, qarapaıym tilshiler atqaratyndyǵyna qaramastan barlyq normalary qatań saqtalyp ótkizildi. Osylaısha sala qonaqtary jeń jolaǵyn tartyp, eki órt oqpanynan sý berdi. Belgili baǵytqa atylǵan sý ekpinine kýá bolǵan BAQ ókilderiniń qýanyshynda shek bolmady. Atalǵan áreket olarǵa erekshe jaýyngerlik rýh pen kúsh-qýat syılaǵandaı áserde boldy.

Bólim bastyǵy Asqar Qýanyshbekuly tilshilerge odan ári ájepteýir entigip, sharshańqyraı bastaǵan tilshilerdi sharanyń úshinshi kezeńi «Jylý tútin kamerasyna» bastap bardy. О́z kezeginde qyzyl sózdiń maıyn tamyzatyn mamandar eki komandaǵa bólinip, atalmysh jaıǵa bas suǵyp, tútinmen betpe-bet aıqasyp, labırınt arasynan zardap shegýshini izdeýge kiristi. Qalaı degenmen jylý tútin kamerasynyń labırınti BAQ ókilderi úshin úlken synaq boldy. Tútinge toly shıyr joldardan ótip, fınıshke jetip, syrtqa shyǵý baqyty bárine birdeı buıyra qoıǵan joq.

Osylaısha tamasha uıymdastyrylǵan sharaǵa jýrnalıster qaýymy alǵystaryn bildirip, qutqarýshylardyń qyzmetiniń qıyn da, aýyrtpalyǵyn jon terimen sezingenderin aıtty.