Adal eńbekke ádil baǵa

Memleket basshysy Qasym-Jomart Toqaev halyqqa arnaǵan tuńǵysh Joldaýynda tótenshe jaǵdaılar qyzmetkerleriniń eren eńbegin erekshe atap ótkeni belgili. Jáne salany qoldaý úshin mamandardyń aılyq jalaqysyn ósirip, adal eńbekteriniń ádil baǵasyn berýdi tapsyrdy. Bul baǵytta Jambyl oblysynda birqatar jumystar júıesin taýyp úlgerdi, dep jazady Qamshy.kz aqparat agenttigi.  Oblystyq Tótenshe jaǵdaılar departamentiniń bastyǵy Baǵdat Danılovtyń aıtýynsha, qazirgi tańda bul jumystarmen jaýapty tulǵalar jiti aınalysýda eken.

- Prezıdent Joldaýda azamattyq qorǵaý salasyna aıryqsha kóńil bólgenin el estide. Bul bizdi jigerlendirgeni anyq. Qazir departamenttiń esepshi mamandary Nur-Sultan qalasynda bıýdjetti naqtylaý máselesimen júr. Buıyrtsa 2020 jyldyń 1-qańtarynan bastap tótenshe jaǵdaılar qyzmeti mamandarynyń aılyq jalaqysy ósedi dep kútilýde. Bul Joldaýdan keıin qolǵa alynyp otyrǵan eń basty jaıt. Budan bólek te sala mamandarynyń jumysyn júıelep, ońtaılandyrý baǵytynda keler jylǵa birneshe jobalarymyzdy ázirlep otyrmyz. Onyń bári kezeń-kezeńimen júzege asatyn bolady, -deıdi Baǵdat Jumauly.

Iá, bul sóz joq bas barmaqpen baǵalaýǵa turarlyq dúnıe. Joldaý júktegen mindettiń minsiz oryndalý barysyn aıǵaqtap tur. Jalpy tek tótenshe jaǵdaılar qyzmetiniń mamandarynyń ǵana emes, keler jyldan qoryqshylar men ormanshylardyń da aılyq jalaqasy ósedi dep kútilýde. Osy tańǵa deıin tehnıkalyq qyzmet mamandarynyń bedelimen teńestirilip kelgen tabıǵat janashyrlary endi óz aldyna mamandyq retinde qaralmaq. Árıne qaı salanyń mamandarynyń aılyq jalaqysy qanshalyqty ósetinin qazir boljaý qıyn. Sebebi bul másele Úkimette pysyqtalyp, esep-qısaby jasalýda. Dese de, seń qozǵalǵany belgili.

- Jasyratyny joq, qazirgi bizdiń aılyq jalaqymyz tehnıkalyq mamandardyń alatynan da az bolyp tur. Alaıda bizdiń jumystyń aýyrlyǵyn árkim biledi. Máselen Moıynqum aýdanynda bir qoryqshyǵa 22 myń gektar jerden belgilenip berilgen. Endi ózderińiz oılap qarańyzdar bir adam osynaý aýmaqty aralap, kúndelikti qorǵaýy tıis. Oǵan taǵy apta saıyn oryn alyp jatqan órt oqıǵalaryn qosyńyz.

Sondyqtan Memleket basshysynyń «qoryqshylardy qamqorlyqqa alyp, aılyq jalaqysyn kóterý qajet» degen usynysyn qos qoldap qoldaımyn. Odan bólek taǵy bir aıta keterligi, eden jýýshy, qaraýyldarǵa emdeý-saýyqtyrý tólemi tólenip jatsa, bizge mundaı tólem múlde qaralmaǵan.

Úkimet osy jaǵyn da rettep berse, nur ústine nur bolar edi, -deıdi Moıynqum ormandardy jáne janýarlar dúnıesin qorǵaý memlekettik mekemesiniń orman kútýshisi Estaı Tileýjanov.

Iá tilek oryndy. Buıyrtsa qoryqshylardyń qalaýy oryndalatyn kún alys emes.