Jambylda jastarǵa qajetti nysandar kóptep ashylýda

Jastarǵa laıyqty tálim-tárbıe berý baǵytynda áleýmettik nysandardyń múmkindigin tıimdi paıdalanýdyń mańyzy zor. Qazirgi tańda Jambyl oblysynda bul baǵytta baıandy bastamalar kóterilýde. «Jambyl oblysy boıynsha eldi mekenderdi mádenıet nysandarymen qamtý jáne olardyń halyqqa qyzmet kórsetý deńgeıin arttyrý kartasyna» sáıkes, 2020-2023 jyldary eldi mekenderde qurylysy josparlanǵan mádenıet nysandarynda «Jastar debattyq klýbtar» bólmelerin ashý qarastyrylǵan. «Rýhanı jańǵyrý» baǵdarlamasy aıasynda 2018 jyly oblys kitaphanalarynda 17 kovorkıng ortalyqtary ashylyp, jastardyń jıi bas qosatyn oryndaryna aınaldy.

Al ústimizdegi jyly 1 kovorkıng ortalyǵy- Sh.Ýálıhanov atyndaǵy ortalyq ámbebap-ǵylymı kitaphanasynda relaks aımaǵy ashyldy.

Sonymen qatar, esepti merzimde «Sıfrly Qazaqstan» baǵdarlamasy aıasynda kitaphanalar janynan 59 aqparattyq ortalyqtary ashylyp, búgingi kúni 130 sıfrlandyrylǵan aqparattyq ortalyqtary qyzmet kórsetýde.

Búginde oblysta 2300-den astam sport nysandary, 200-den astam mádenıet nysandary, 26 aýla klýbtary jastar ıgiligine qyzmet etýde, Jol kartasy aıasynda qosymsha 146 nysan ashý josparlanǵan. Onyń ishinde (mádenıet salasy boıynsha 65, sport salasy boıynsha 80 ashý kózdelgen. Ústimizdegi jyldyń 9 aıynda 81 nysan paıdalanýǵa berilip úlgerdi.

Naýryz merekesi qarsańynda oblys ortalyǵynda kólemi 6,3 gektardy quraıtyn jerge «Jastar alleıasy» paıdalanýǵa berililýi de jambyldyq jurtshylyq, ásirese jastar úshin keremet tartý boldy. Atalǵan alleıada «Mahabbat» stelasy, «Bilim» alańy, «Jastar» qabilet ortalyǵy, «Kitap» alańshasy sekildi ıdeologııalyq mańyzdy oryndar ornalasqan. Bul nysan jastardyń bos ýaqyty men bilim alýyn tıimdi úılestiretin, aqparattyq tehnologııalardy erkin qoldanatyn úlken alańǵa aınalýda.

Qalaı degen kúnde de jastarǵa sapaly bilim men sanaly tárbıe berýmen shektelmeı, olarǵa qajetti nysandardy kóptep salýdan utpasaq utylmaımyz. О́ıtkeni, bos ýaqytyn tıimdi ótkizýge daǵdylanǵan jastar erteń atpal azamatqa aınalary kúmán týdyrmaıdy. Bul turǵyda jergilikti jastar úshin barlyq jaǵdaıdy jasap, mol múmkindik qarastyryp otyrǵan Jambyl oblysynyń bastamalary maqtaýǵa turarlyq.