Aýyldy oılaıtyn jastar az emes

Elbasy N.Nazarbaevtyń tikeleı yqpalymen qabyldanǵan «Dıplommen aýylǵa» baǵdarlamasy –jastarǵa jasalǵan aıryqsha qamqorlyqtyń bir kórinisi. Baǵdarlama qolǵa alynǵan ýaqyttan beri qanshama jas shalǵaıdaǵy eldimekenderge at basyn buryp, halyqqa qyzmet kórsetýde. Sonyń nátıjesinde aǵaıynnyń alǵysyna kenelip, abyroıy asqaqtaýda.

Bıylǵy Jastar jylynda da «Dıplommen aýylǵa» baǵdarlamasy arqyly alys aımaqtarda eńbek jolyn bastaǵysy keletinderdiń qatary azaıǵan joq. Qaıta burnaǵy jyldarǵa qaraǵanda edáýir arta túsken.

Jalpy, bıyl «Dıplommen aýylǵa» baǵdarlamasy aıasynda 655 mamanǵa 124 mıllıon teńgege kóterme járdemaqy jáne 256 mamanǵa turǵyn úı satyp alýǵa 970 mıllıon teńge qarjy qarastyryldy.

Ústimizdegi jyldyń 1 qazanyna 477 mamanǵa 90,9 mıllıon teńge kóterme járdemaqy jáne 233 mamanǵa turǵyn úı satyp alýǵa 843,6 mıllıon teńge nesıe berilip úlgergen.

Osyndaı múmkindikke qol jetkizgen jas mamandar ártúrli salanyń ókilderi. Mysaly, bilim salasy boıynsha 306 jas mamanǵa 57,4 mıllıon teńge kóterme járdemaqy jáne 142 jas mamanǵa 516,7 mıllıon teńge turǵyn úı satyp alýǵa nesıe berilgen.

Al densaýlyq saqtaý salasy boıynsha 115 mamanǵa 23 mıllıon teńge kóterme járdemaqy jáne 62 jas mamanǵa 222 mıllıon teńge turǵyn úı satyp alýǵa nesıe úlestirilgen.

Sol sııaqty mádenıet salasy boıynsha aýyldy jerde eńbek etýge 10 jas maman nıet bildirgen. Olarǵa 1,8 mıllıon teńge kóterme járdemaqy jáne 3 jas mamanǵa 11,3 mıllıon teńge turǵyn úı satyp alýǵa nesıe berildi.

Áleýmettik qamsyzdandarý salasy boıynsha bir ǵana jas maman kelgen. Ol Jýaly aýdanynda eńbek jolyn bastap otyr. Jas mamanǵa 176,8 myń teńge járdemaqy berilipti.

Sonymen qatar sport salasy boıynsha 11 jas mamanǵa 2 mıllıon teńge kóterme járdemaqy jáne Baızaq, Jýaly aýdandarynda jumysqa kirisken 2 jas mamanǵa 7,6 mıllıon teńge nesıe berildi.

Aýylsharýashylyǵy salasy boıynsha 34 jas mamanǵa 6,3 mıllıon teńge kóterme járdemaqy jáne 24 jas mamanǵa 86 mıllıon teńge nesıe berildi. Búginde jalyndy jastar memleket qoldaýynyń arqasynda óz jumystaryn úlken jaýapkershilikpen atqarýda.