«Qazaqstannyń úzdik taýary-2019» kórme-baıqaýyna mańǵystaýlyq Ásem О́tepova qatysty

26 jastaǵy jas dızaıner, sheber Ásem О́tepova «ASEM ANDREI» brendiniń jetekshisi. Jeke kásibin ótken jyly bastady. Az ýaqyt ishinde birqatar baıqaýlarǵa qatysyp, óziniń qaıtalanbas týyndylarymen kópshiliktiń kóz qýanyshyna aınalyp úlgerdi. Sóıtip tamyz aıynda Aqtaý qalasynda ótken «Qazaqstannyń úzdik taýary» óńirlik kórme-baıqaýyna óz jumystaryn qoıdy. Onda «Halyq tutynatyn úzdik taýarlar» atalymynda  JK «ASEM ANDREI» top jaryp, Nur-Sultan qalasyndaǵy respýblıkalyq dodaǵa joldama alǵan edi.

Nur-Sultanǵa jas sheber mańǵystaýlyq 8 kompanııanyń biri retinde, úlken daıyndyqpen bardy. Qyz jasaýy, ulttyq kıimder toptamasyn qazylar alqasynyń aldyna usyndy. Júldegerler jeltoqsan aıynda Memleket basshysynyń qolynan marapat alady dep josparlanǵan.

Ásemniń jumystarynyń basqalardan ereksheligi- eski jádigerlerdegi oıý-órnek, tańbalardy zamanaýı baǵytta paıdalaný. Máselen, ejelgi tastaǵy tańbalardy kajekeı, kamzol syndy ulttyq kıimderge salýdy Qazaqstanda alǵash bop Ásem bastaǵan.

-«Tastaǵy tańbaly jazýlardy kıimge salý ádisin oılap tapqan edi. Keıin almatylyq dızaınerler paltoǵa kóshirip basqanyn baıqap júrmiz. Arnaı qujattarmen zańdastyryp almaǵan soń, ala bersin deımiz. Ásemniń ıdeıasymen alǵash jasalǵan dúnıelerdi keıbireýler ruqsat surap, paıdalanyp jatatyndar da kezdesedi. Sondyqtan da bilgenin úıretý úshin sheberlik saǵattaryn júrgize bastady»,- deıdi jeke kásipkerdiń ákimshisi ári týysy SvetlanaAndreıqyzy.

Ásemnińboıyna qolóner, tigin isi ájesi men anasynan daryǵan. Bala kezde osy eki aqylshysyna eliktep, ine-jibin qolynan tastamady. Biraq ony qosymsha kásibim dep qabyldap, IT mamandyǵy boıynsha joǵarǵy oqý ornyn, sonan soń magıstratýrany bitirdi. Biraq bala kezgi súıikti isine ańsary aýdy da turdy. Sóıtip byltyr qaraǵandylyq sheberden qyz jasaýyn tigýdi jetik meńgerip, óz kásibin ashty. Tapsyrys kún sanap arta tústi. Qazir sheber 5 adamdy jumyspen qamtyp otyr. Aıyna orta eseppen 20 shaqty tapsyrys qabyldaıdy. О́z qoldarynan shyqqan kórpeler, jastyqtar, qyzdyń túgel jasaýy, shymyldyq, kamzol, kájekeı, kóılekter, syrǵa salý jabdyǵy, besik jasaýlaryna tapsyrys tolastaǵan emes. Olarǵa sapaly matalar tańdap alynady. Negizinen maqpal, barqyt, jibek sııaqty qundy matalarmen tigiledi. Sonan soń, syrylyp tigilip, monshaq, oıýlarmen kómkeriledi. Qazir keýdege taǵatyn monshaqtalyp, úkilengen broshtar úlken qyzyǵýshylyq týdyryp otyr.

-«Broshtardy usaq monshaqtar, úki, áshekeımen bezendirip kıimge taǵýdy ózim oılap taptym. Sondaı-aq, syrǵa salý salty kezinde arýǵa tóseletin ádemi kórpe men syrǵa salýǵa arnalǵan sáýkele pishindes qobdıshany qosarly jabdyq retinde shyǵarý ıdeıasy týyp, úlken suranysqa ıe boldy. Tastaǵy tańbalardy jańǵyrtyp, sánge aınaldyryp, nege kıimge salmasqa degen oı keldi. Bul da sátti shyqqan dúnıe boldy»,- deıdi «ASEM ANDREI» brendiniń ıesi Ásem О́tepova.

Jas sheberdiń qolynan shyqqan buıymdar Mańǵystaý oblysyn aıtpaǵannyń ózinde, Atyraý, Almaty, Taraz, Balqash óńirlerinen suranysqa ıe.  Kóptegen aımaqtardan qolónerdi úırengisi keletinder qatary artqan soń sheberlik saǵatyn ótkizýdi bastady. Qazirdiń ózinde Nur-Sultan, Almaty, Atyraý, Aqtóbe qalalaryn baryp sheberligimen bólisip, jańa sheberlerdiń shyǵýyna at salysyp júr. Olardyń kóbisi óz aýyldarynda jeke kásibin bastap ketken.

Alda has sheberde jospar kóp. Ejelgi ulttyq buıymdardy zamanaýı úrdispen úılestirip, jastarǵa nasıhattaý jolynda aıanbaı ter tóge bermek. Almaty men Atyraý qalalarynyń iri saýda úıleri «ASEM ANDREI» brendin kóterme tapsyryspen alyp, saýdalaýǵa daıyn.