Aqtaýda «Kórpe Fest» mega festıvali ótti

Aqtaýda alǵash ret QR Eńbek jáne halyqty áleýmettik qorǵaý mınıstrligi men Mańǵystaý oblysy ákimdiginiń uıymdastyrýymen «Kórpe Fest» mega-festıvali ótti. Is-sharaǵa QR Premer-mınıstriniń orynbasary Berdibek Saparbaev qatysty.

Festıval aıasynda oqytý semınarlary, tigin jáne qoldanbaly óner boıynsha sabaqtar ótkizildi, áleýmettik jelilerde bıznes júrgizý boıynsha sheberlik synyptary men kórmeler uıymdastyryldy.

Bul áleýmettik joba kóp balaly analar men az qamtylǵan áıelderdiń jeke isin júrgizýge, óz múmkindikterin damytýǵa, sondaı-aq ulttyq qolónerdi odan ári tanymal etýge kómektesedi.

Shara aıasynda tanymal etnodızaıner, «Altyn sapa» syılyǵynyń laýreaty Yrza Tursynzadanyń qolónershi izbasarlary daıyndaǵan buıymdarynyń jármeńkesi ótti.

Sonymen qatar, «Analar amanaty» derekti serıalynan fılm kórsetilip, onda «Mádenı muralar men ulttyq qolónerdi jańǵyrtý» áleýmettik jobasy týraly aıtyldy.

Yrza Tursynzada men onyń shákirtteri Mańǵystaý oblysynyń tarıhı oryndary boıynsha ekspedısııa uıymdastyryp, olar «Beket Ata» meshitine óz qoldarymen tigilgen jastyqtar, kórpeler, ulttyq naqyshtaǵy jamylǵylar syılady.

Sondaı-aq, elimizdiń tól mádenıetiniń damýyna zor úles qosyp júrgen batyr analarǵa «Amanat» qoǵamdyq qory atynan premııa, eń ozyq tiginshilerge Mańǵystaý oblysy ákimdigi men «Tigin mashınalar úıi» atynan barlyǵy 30 tigin mashınasy, qarjylaı sertıfıkattar men alǵys hattar tabystaldy. Al, qyz-kelinshekke arnalǵan eń ádemi kóılek tikken qatysýshyǵa arnap avtorlyq dızaında jasalynǵan matalar syılyqqa tapsyryldy.