• USD 389.52
  • EUR 429.21
  • RUB 6.07
  • CNY 54.94
08 Jeltoqsan, 02:29:08
Qazaqstan Ýkraınanyń saýda naryǵyna alańdaýly

14 Qazan, 2019 Mańǵystaý oblysy

Aqtaýda Ábish Kekilbaıulynyń 80 jyldyǵyna arnalǵan mereıtoılyq is-sharalardyń ashylý saltanaty ótti

10 qazan kúni Aqtaýda Abaı atyndaǵy mádenı-demalys kesheninde Qazaqstan Respýblıkasynyń Mádenıet jáne qoǵam qaıratkeri, Memlekettik syılyqtyń ıegeri, Halyq jazýshysy Ábish Kekilbaıulynyń 80 jyldyǵyna arnalǵan mereıtoılyq  is-sharalardyń ashylý saltanaty bolyp ótti.

Saltanatty sharaǵa Qazaqstan Respýblıkasynyń Premer-Mınıstriniń orynbasary  Berdibek Saparbaev, Mańǵystaý oblysynyń ákimi Serikbaı Trumov jáne elimizdiń ár túpkirinen kelgen el aǵalary, Ábish aǵanyń zamandastary, úzeńgi-áriptesteri, qabyrǵaly qalamgerler men óner tarlandary, ǵalymdar, jurtshylyq ókilderi qatysty.

Merekelik sharanyń bastaýynda aıtysker aqyn Mels Qosymbaı Á.Kekilbaevqa arnalǵan «Arnaýmen» jyr darııasyn seldetti.

Sharada sóz alǵan Premer-Mınıstrdiń orynbasary  Berdibek Saparbaev  QR Tuńǵysh Prezıdenti, Elbasy N.Nazarbaevtyń Mańǵystaý jurtshylyǵyn atalǵan mereıtoımen quttyqtaýyn jetkizdi.  

-Eń bastysy «Basymyzǵa qonǵan baqyt qusy – táýelsizdigimizden aırylyp qalmaýymyz kerek» dep meniń baǵytymdy qoldap, halyqty sabyrly da, sanaly bolýǵa shaqyrǵany barsha qazaqstandyqtardyń esinde. Joǵary keńestiń tóraǵasy, memlekettik  hatshy sııaqty bıik laýazymdy qyzmetterdi atqarǵan ol ózine artylǵan zor senimdi abyroımen aqtaı bildi. Parlament senatynyń depýtaty bolǵan tusta da qoǵam tynysyn tap basyp, tutas eldiń oıyndaǵy sózin sóıledi. Asyl azamattyń mereıtoıyn búginde týǵan eli laıyqty atap ótýde. Almaty qalasyndaǵy bir kóshege Ábish Kekilbaevtyń aty berildi. Kıeli Mańǵyystaýda eńseli eskertkish boı kóterip, mádenı ortalyqtyń tusaýy kesilip otyr. Danyshpan Abaıdyń «Súıer ulyń bolsa, sen súı, súıinerge jarar ol» degen sózi bar. El jurtyna sińirgen eleýli eńbegi men tarıh tórinen oryn alǵan Ábish Kekilbaevtyń ǵıbratty ǵumyry halqymyzdyń jadynda árdaıym saqtalady dep senemin. Mereıtoı qutty bolsyn, aǵaıyn!» – delingen quttyqtaý hatta.

Saltanatty keshtiń ashylýynda aımaq basshysy Serikbaı Turymov merekege oraı alystan kelgen mártebeli  meımandarǵa rızashylyǵyn bildire otyryp, Ábishteı zańǵar jazýshynyń 80 jyldyq mereıtoıyn atap ótýdiń búkil Qazaq eli úshin, halqymyzdyń ótkeni men búginin saralap,jarqyn keleshegine bastaıtyn mańyzy zor, aýqymdy, irgeli is bolyp tabylatynyna toqtaldy. Halyq jazýshysynyń mol ádebı  murasyn urpaqtan-urpaqqa jetkizip, halqymyzdyń rýhanı baılyǵyn arttyrý qajettiligin tilge tıek etti.

-«Ábish Kekilbaıuly kórnekti memleket qaıratkeri retinde egemen elimizdiń ósip-órkendeýine bar kúsh-qajyryn sarp etti. Qazaqstan Parlamentiniń Tóraǵasy, Memlekettik hatshy, Prezıdent keńesshisi, senator qyzmetin laıyqty atqardy. Táýelsizdikti baıandy etý jolyndaǵy tabandy kúresine tarıh kýá. QR Tuńǵysh Prezıdenti janynda  uzaq jyldar boıy qyzmet etti. Syndarly saıası qyzmette senimdi serigi, kúrmeýli kezeńde danagoı keńesshisi bola bildi. Elbasynyń sarabdal saıasatyn  júzege asyrýda aıanyp qalmady.  Táýelsizdikti alǵan tusta kesek oı, astarly pikir bildirip, tyń túıin jasaýǵa umtyldy. Qoǵam men qaýymdy tolǵandyrǵan keleli máseleler jóninde keń tolǵap, adal sóıledi. Ábish aǵanyń eldikti nyǵaıtý jolyndaǵy eńseli eńbegi Elbasy tarapynan joǵary baǵalanyp, táýelsiz Qazaqstannyń Eńbek Eri atandy. Bizdiń kózdegenimiz – Ábish Kekilbaıulynyń baı ádebı murasyn izgi urpaq ókilderine nasıhattaý, oı-sanasyna sińirý. Ult mártebesine aınalǵan Uly sýretkerdiń bir ózi bir dáýirge turarlyq  mazmuny tereń týyndylaryn atadan-balaǵa, urpaqtan-urpaqqa amanat etý – azamattyq paryzymyz»,- dedi Mańǵystaý oblysynyń ákimi S.Trumov.

Mádenı keshende Ábish Kekilbaıulynyń ómiri men shyǵarmashylyǵyna arnalǵan  murajaı jáne kitaphana, foto kórmeleri  uıymdastyryldy.

         Kórnekti qalamger, dramatýrg, synshy, memleket jáne qoǵam qaıratkeri, fılosof Ábish Kekilbaevtyń alar orny erekshe. Onyń eńbekteriniń barlyǵy derlik el men jer, Otan taǵdyryna arnalǵan. Áleýmettik jáne ekonomıkalyq máselelerdi tereńinen qaraı otyryp, el bolashaǵy men kópultty memleketimizdiń  ál-aýqaty onyń jadynan tys qalǵan emes. Ábish Kekilbaıuly Qazaqstan Respýblıkasynyń alǵashqy Memlekettik hatshysy bolǵan.  (1996-2002). Al, 2002 jyldan bastap QR Parlament Senatynyń depýtattyǵyna taǵaıyndaldy. II jáne III shaqyrylymyndaǵy Qazaqstan Respýblıasy Parlament Senatynyń depýtaty.

I shaqyrylymdaǵy Qazaqstan Respýblıkasy Parlament Májilisiniń depýtaty, Halyqaralyq qatynastar, qorǵanys jáne qaýipsizdik komıtetiniń tóraǵasy.XIII shaqyrylymdaǵy Qazaqstan Respýblıkasy Joǵarǵy Keńesiniń tóraǵasy

Á.Kekilbaevty tek qazaq eli ǵana emes, sonymen qosa orys, nemis, túrik jáne t.b. elderde súıikti jazýshy, kórnekti qalamger ári birden-bir saıasatker dep tanydy. Ábish Kekilbaıulynyń memlekettik jáne qoǵamdyq saıası  belsendiliginiń roli erekshe baǵalandy.

         Qazaqstannyń damýy úshin aıanbaı ter tókken Ábish Kekilbaev  elimizdiń ekonomıkalyq, áleýmettik, saıası, ekologııalyq, ultaralyq, dıplomatııalyq, halyqaralyq t.b. máselelerinde belsendilik tanytty.

         Qazaqstannyń damý jolyn saralap, halyq taǵdyryna janashyrlyqpen qarap, azattyq jolynda ulttyq múdde men ulttyq sananyń órbýine óz úlesin qosqan birden-bir azamat.

Jıynda jazýshy Tólen Ábdikuly jáne aqynEsenǵalı Raýshanovtar kesh qonaqtaryna quttyqtaý sóz arnady.

Merekelik kesh Aıgúl Úlkenbaeva, N.Jantórın atyndaǵy mýzykalyq drama teatry akterleri,Aıgúl Qosanovalardyń oryndaýyndaǵy «Mańǵystaý» poetıkalyq qoıylymynyń sahnalanýymen jalǵasty.

Kesh  qonaqtarynyń aldynda N.Jantórın atyndaǵy mýzykalyq drama teatry akterleri, Gúlsına Mırǵalıevanyń  teatr mektebi, Halyqtyq ujym «Jorǵa» bı ansambli Á.Kekilbaıuly shyǵarmalary men suhbattarynyń negizinde teatrlandyrylǵan «Amanat arqalaǵan Abyz» atty prologty sahnalady.

Saltanatty jıynnyń sońy  Tamara Asar, Halyqtyq ujym «Jorǵa» bı ansambliniń oryndaýyndaǵy  «Ábish Álemi» qoıylymyna ulasty.

Ilmek sózder: Mańǵystaý oblysy

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir