"Eldik elge baılanysty" forýmy Sarysýda jalǵasty

Jambyl oblysynda qoǵamdyq kelisim men saıası turaqtylyq, etnosaralyq jáne konfessııaaralyq beıbitshilik, birlik pen yntymaq, ulttyq qundylyqtardy jańǵyrtý maqsatynda, óńir tarıhynyń asa mańyzdy kezeńi – Jambyl oblysynyń qurylǵanyna 80 jyl tolýy qarsańynda «Rýhanı jańǵyrý» baǵdarlamasy aıasynda ótken «Eldik elge baılanysty» qoǵamdyq forýmy Sarysý aýdanynda jalǵasyn tapty. Bul týraly Sarysý aýdany ákimdiginiń baspasóz qyzmeti habarlady.

Basqosýǵa ardager qarııa Áskerbek Jumataev moderatorlyq etti. Forým barysynda túıitkildi máseleler, ulttyq dástúr men ádet-ǵuryptyń ýaqyt aǵymymen ózgerýi, ysyrapshyldyq pen dańǵazalyqqa jol bermeý, jastar tárbıesiniń ózektiligi týraly aýdanymyzdyń aqsaqaldary men el aǵalary, bilimdi ári parasatty azamattary sóz sóıledi. Mysaly, aýdandyq máslıhattyń depýtaty Asanbaı Seınalıev berekeli birliktiń bererir mol ekenin keńinen tarqata áńgimeledi.

Al aýdandyq "Alqa bıler" keńesiniń tóraǵasy Qalmyrza Jandarbekov «Qarty bar úıdiń, qazynasy bar!» atty baıandama jasap, úlkendi syılaýdyń ónegesi týraly sóz qozǵady. Kelesi kezekte aýdandyq meshittiń bas ımamy Ǵalymjan Qonaqbaevtyń «Dinı joralǵylardy jasaýda ysyrapshyldyqqa jol bermeý» taqyrybyndaǵy sózi kóp kópke oı salarlyqtaı boldy. Sonymen qatar bilim berý salasynyń ardageri Ryzyqııa Smaǵúlova «Tárbıe tal besikten bastalady» atty baıandamasy arqyly jastardyń uıaly telefon ınternetten góri kóbirek ýaqyttaryn kitaphanada ótkizse degen usynysyn aıtty.

Medısına salasynyń ardageri Zaýal-Mahan Abzalbekov bolsa «Toı mádenıetin jańǵyrtý kerek. As ta, tóktikti doǵaraıyq aǵaıyn!,-dep búgingi zamandaǵy oryn alyp jatqan ysyrapshyldyqqa toqtalyp ótti. Mádenıet salasynyń ardageri, Jaıylma aýyldyq okrýgi ardagerler uıymynyń tóraǵasy Serikbek Satqyntegi de «Aqsaqaldyqtyń abyroı-bedelin bıiktetý – ýaqyt talaby» dep, keıingi jastarǵa úlgi-ónege kórsetý aldyńǵy lek mindeti ekendigine toqtaldy. Sondaı-aq, Jańatas qalasynyń turǵyny, eńbek ardageri Shákızat Saparbaeva «Anaǵa qarap, qyz óser... Biz de kelin bolǵanbyz...Ene boldyq minekeı! Tatý-tátti qazaq otbasylarynda ósken qyz balalar babalarymyzdan daryǵan asyl qasıetterdiń arqasynda aqyldy da kórikti bolyp ósip keledi. Talapshyldyqtyń nátıjesinde qandaı isti qolǵa alsa da tııanaqty etip atqarady. Balalyq shaqta alǵan jaqsy tálim-tárbıe ómirlik azyq bolary haq. As isherde tazalyqty, kıim kıerde tııanaqtylyqty, áńgime tyńdaýda zeıindilikti, júrip-turýda uqyptylyqty eń aldymen áıel zaty baqylap otyratyny shyndyq. Balalary aqyldy, alǵyr, jaýapkershiligi mol bolyp ósse, áıel qashanda olardyń qýanyshty kelbetinen qýat alyp, ózin sergek sezinedi,-deı kele búgingi tárbıe máselesi jóninde jetkize aıtty.

Kelesi sóz Jańatas qalasynyń kásipkeri, «AıanHoll» meıramhanasynyń ıesi Raıymbekova Qýanyshqa berildi. Kóterilgen máselege baılanysty, ásirese myna meıramhanalar men toıhanalardyń túngi saǵat 23:00-den keshikpeı toı-jıyndardy toqtatý máselesi oryndy ekendigine toqtalǵan kásipker qashanda oryndy usynystardy qoldaıtynyn aıtty.