Jambylda ulttyq oıyndar ulyqtaldy

«Nur Otan» partııasy Jýaly aýdandyq fılıalynyń uıymdastyrýymen aýdandyq Ortalyq stadıonda ulttyq sport túrlerinen aýdandyq týrnır bolyp ótti. Bas partııanyń Saıası Doktrınasyn iske asyrý aıasynda ótkizilip otyrǵan bul týrnırge aýdannan 500-ge jýyq adam qatysty. Sondaı-aq, atalmysh týrnırdiń ótýine demeýshilik jasap, qoldaý tanytqan «Nur Otan» partııasynyń Jambyl oblystyq máslıhatyndaǵy depýtattyq fraksııasynyń múshesi Álimbek Ásembekuly Jumabaev, aýdandyq máslıhattyń depýtattary, bastaýysh partııa uıymdarynyń jetekshileri, aýdandyq mádenıet úıiniń ónerpazdary, BAQ ókilderi qatysty.

Saltanatty kezdesýdi «Qyzǵaldaq» án-bı ansambliniń bıshileri «Qazaq bıimen» ashty. Aýdandyq týrnırdiń ashylý saltanatynda Álimbek Jumabaev sóz sóıledi. Ol óz sózinde: «Kez-kelgen el, salt-dástúrin saqtaǵanda ǵana damyǵan elder qataryna qosylady. Ulttyq oıyndardy ulyqtaýdaǵy basty maqsat ta osy edi. Erteden kele jatqan ulttyq oıyndarymyz bir kezde umyt bolyp, keıingi jyldary qaıta jańǵyryp, el arasynda keńinen taralyp keledi. Qazaqtyń ulttyq oıyndary halqymyzdyń mádenı asyl murasy. Búgingi ótkizilip jatqan Ulttyq oıyndar báıgesin dástúrge aınaldyrý kerek»,- dedi. Al, «Nur Otan» partııasy Jýaly aýdandyq fılıaly tóraǵasynyń birinshi orynbasary A.Ahmetova óz tarapynan jınalǵan sportsúıer qaýymdy quttyqtap, ótkizilip otyrǵan týrnırdiń maqsat-mindetterimen tanystyryp, demeýshilik jasap otyrǵan azamatqa alǵysyn bildirip, sportshylarǵa sáttilik tiledi.

Sodan soń, týrnırdiń bas tóreshisi, partııa múshesi Arzymbetov Maqsutbek Ábdiuly jarys erejesimen tanystyryp, týrnır bastaý aldy. Jarysqa qatysýshylar ulttyq oıyndardyń 7 túrinen synǵa tústi. Atap aıtsaq, aýdaryspaq, teńge ilý, qoshqar kóterý, asyq atý, qatyn kúres jáne arqan tartýdan sheberlik baıqasty. Alǵashynda kórermen-jankúıerler «Teńge ilý» ulttyq oıynyn tamashalady. «Attyń qulaǵynda oınaǵan» ár aýyldan kelgen jigitter stadıon alańynda birdeı araqashyqta aq oramalǵa túıilgen teńgeni shaýyp kelip, alý kerek. Biri jarystyń erejesin oryndaı alsa, ekinshileri attyń jeteginde ketip, túıinshekti ustaı almaı jatty. Ekinshi kezekte ótken «Aýdaryspaq» ulttyq oıynynda aýyl azamattary kúshtilik, tapqyrlyq men shydamdylyq tanytty. Aqtóbe, Qarasaz, Jetitóbe, Boraldaı, Qoshqarata, Kúreńbel aýyldarynan kelgen palýandar ekinshi aınalymǵa jetip, úshinshi oryndy kúreńbeldik Almas Qadyrov alsa, qoshqaratalyq Raýan Nurpeıis ekinshi jáne jetitóbelik Baqyt Dáýrenbekov júldeli birinshi oryndy ıelendi. «Arqan tartý», «Qashpa dop», «Qatyn kúres», «Asyq atý» ulttyq oıyndar barysynda aýyldyq okrýgterden kelgen komandalar óz eptiligi men tapqyrlyǵyn tanytyp, kúsh synasty. Jarysqa qatysýshylar birinen-biri ozyp, óz ónerlerin ortaǵa saldy. Jarystyń tóreshileri aýyldyq okrýgterden kelgen komandalarǵa jalpy komandalyq

baǵa beretin bolǵandyqtan, olardyń ár múshesi janashyrlyq tanytyp, jan-tánimen oıyndarǵa qatysyp otyrdy.

Jarystyń eń sońǵy erekshe oıyny - «Qoshqar kóterý» ulttyq oıyn barysynda kúshtiligi men eptiligigin tanytyp, eń kóp ret 60 kelilik qoshqardy kótergen Qaırat aýylynyń turǵyny Nurseıit Mahanbetjan jeńimpaz atanyp, sol kótergen qoshqaryn qanjyǵasyna baılap ketti. Osy jerde ótken aýdan ónerpazdarynyń konserti de merekeniń shyraıyn ashty. Án aıtylyp, kúı tartyldy. Aýdan ónerpazdarynyń óneri de kópshiliktiń nazaryn aýdardy. Tóreshilerdiń bergen baǵasynyń qorytyndysymen komandalyq birinshi oryndy Aqsaı aýyldyq okrýgi, ekinshi oryndy Kúreńbel aýyldyq okrýgi jáne úshinshi júldeli oryndy Jetitóbe aýyldyq okrýginiń sportshylary jeńip aldy. Týrnır sońynda demeýshi bolǵan halyq qalaýlysy Álimbek Jumabaev saltanatty túrde birinshi oryn alǵan jeńimpazdarǵa 200 myń teńge, ekinshi orynǵa – 150 myń teńge jáne úshinshi orynǵa - 100 myń teńge tapsyrdy. Sonymen qatar, qatyn kúreske Myńbulaq aýyldyq okrýgi atynan shyǵyp, óz ónerimen erekshe kózge túsken jasy 60-qa taıap qalǵan apamyz Altynaı Baıǵabylovaǵa 20 myń teńge tabys etti. Týrnırdiń sońy aýdandyq mádenı demalys jáne halyq shyǵarmashylyǵy ortalyǵy ártisteriniń konserttik baǵdarlamasyna ulasty.