Jýalyda IT synyptar kóptep ashylady

Qazaqstan Respýblıkasynyń Prezıdenti Q.Toqaev «Syndarly qoǵamdyq dıalog – Qazaqstannyń turaqtylyǵy men órkendeýiniń negizi» atty Qazaqstan halqyna Joldaýynyń tórtinshi mindetinde áleýmettik jańǵyrýdyń jańa kezeńin aıqyndaǵan bolatyn. Osy oraıda Jambyl oblysyndaǵy Jýaly aýdanynyń bıýdjeti ekonomıkany damytý, adamı kapıtaldyń sapasyn jaqsartý jáne basqa da áleýmettik máselelerdi sheshýge baǵyttalǵan.

-Sapaly bilim berý – oqytý men tárbıeleýdiń úzdiksiz úrdisi. Bilim berý salasynyń materıaldyq-tehnıkalyq bazasyn jaqsartý maqsatynda aýdanda sońǵy úsh jylda jańadan bir mektep salynyp, paıdalanýǵa berilse, segiz mektepte kúrdeli jóndeý jumystary júrgizildi. Jalpy bilim salasyna ótken jyly 5,6 mıllıard teńge bólinse, bıyl 5,8 mıllıard teńge bólinip otyr,-deıdi bul turǵyda Jýaly aýdanynyń ákimi Narbaı Ergebekov.

Aıta ketý kerek, ótken jyly aýdanda bir IT synyp ashylǵan. Al aǵymdaǵy jyldyń sońyna deıin taǵy da osyndaı úsh IT synyp ashý josparlanýda. Aýdandaǵy 13 (33%) mektep robototehnıkasy kabınetterimen jabdyqtalǵan. Osy oqý jylynda taǵy 10 mektepti jabdyqtaýdy josparlanyp otyrǵan kórinedi.

Aýdanda qala men aýyl mektepteri arasyndaǵy alshaqtyqty azaıtý maqsatynda Aqtóbe orta mektebiniń janynan «Tirek» mektebi (resýrstyq ortalyq) ashylyp, jumysyn júrgizýde.

Joldaýda atalǵandaı, «Dıplommen – aýylǵa!» baǵdarlamasynyń aıasy keńeıtilip, jumys jańa deńgeıde jalǵastyrylýda. Osyǵan oraı, aýdanda birinshi kezekte qajetti mamandyqtarǵa basymdyq berilýde.

2019 jyldyń maýsym aıynan bastap bıýdjet salasynyń aılyǵy tómen qyzmetkerleriniń jalaqysyn kóterýge mektepterge respýblıkalyq bıýdjetten 383 213 myń teńge bólinip, 1754 pedagog qyzmetkerdiń jalaqysy 15-25 paıyz aralyǵynda ósti. Joǵarǵy bilimdi muǵalimniń eń tómengi jalaqysy 72 557 teńgeden 90 697 teńgege 25 paıyz kóterilse, eń joǵarǵy jalaqy 103 970 myń teńgeden 119 676 myń teńgege 15 paıyz kóterildi (15 706-18 140 teńge aralyǵynda qarajat qosyldy). Orta bilimdi muǵalimniń eń tómengi jalaqysy 60 833 teńgeden 71 230 teńgege 17 paıyz kóterilse, eń joǵarǵy jalaqy 86 052 myń teńgeden 99 988 myń teńgege 16 paıyz kóterilip otyr. Iаǵnı, 10 397-13 936 teńge aralyǵynda qarajat qosylǵan.