Almatyda A. Qoshanovtyń 85 jyldyǵy atalyp ótti

Almatyda ál-Farabı atyndaǵy ǵylym men tehnıka salasy boıynsha Memlekettik syılyqtyń ıegeri, Qazaqstan Respýblıkasynyń eńbek sińirgen ǵylym qaıratkeri, QR UǴA-nyń akademıgi Amanjol Qoshanovtyń týǵanynyń 85 jyldyǵyna jáne ǵylymı ári qoǵamdyq qyzmetiniń 60 jyldyǵyna arnalǵan halyqaralyq sımpozıým ótti, dep jazady ákimdiktiń baspasóz qyzmeti.

Alqaly jıyn barysynda Almaty qalasy ákiminiń orynbasary Erjan Babaqumarov saltanat ıesin 85 jyldyq mereıli jasymen quttyqtady jáne Memleket basshysy Qasym-Jomart Toqaevtyń arnaıy quttyqtaý hatyn oqyp berdi.

«Qurmetti Amanjol Qoshanuly! 85 jasqa tolǵan mereıtoıyńyz qutty bolsyn! Siz kórnekti ǵalym retinde otandyq ekonomıkalyq ǵylymdy qalyptastyrýǵa mol úles qosyp kelesiz. Sizdiń ǵylymı eńbekterińiz jáne ilgeri zertteýlerińiz táýelsiz memleketimizdiń órkendeýine ózindik paıdasyn tıgize beretini sózsiz», – delingen jedelhatta.

Sımpozıýmnyń jumysyna tanymal otandyq jáne sheteldik ǵalymdar, joǵary oqý oryndarynyń qyzmetkerleri, memlekettik bılik organdarynyń, bıznestiń, halyqaralyq jáne úkimettik emes uıymdar men qoǵam ókilderi qatysty.