Ermekbaev: Jumys qaýipti, ómirleri úshin qaýip-qater bar

Qazaqstannyń qorǵanys mınıstri Nurlan Ermekbaev Arys qalasyn oq-dáriden tazartý jumystarynyń  júrgizilý barysy men áskerı qyzmetshilerdiń atqaryp jatqan qyzmeti týraly aqparat berdi,  dep habarlaıdy Qamshy.kz aqparat agenttigi. 

Mınıstrdiń málimetinshe, Arys qalasyndaǵy jaǵdaıdy retteý úshin 700-den astam adam tartylǵan.  Ermekbaev Arys mańynda qansha oq-dári qalǵanyn aıtýǵa quqy joq ekenin atap ótti.

- Biz qazir joǵary bas qolbasshynyń tapsyrmasyn oryndap júrmiz. Qalǵan oq-dárini tezirek shyǵarýdy talap etip otyrǵan arystyqtardyń talaby, memlekettik qajettilik bar. Biz ondaǵy jumystarǵa áskerge shaqyrylǵandardy jumyldyrmaımyz. Tek biliktiligi joǵary, daıarlanǵan saperler men ınjenerler, áskerı polıseılerdi tartamyz. Barlyǵy da kelisimshart boıynsha qyzmet etetinder, - dedi Ermekbaev úkimet kýlýarynda.

Ermekbaevtyń aıtýynsha, "Arys qalasynyń turǵyndaryna qaýip tónip turǵan joq".

- Áskerıler barlyq jerde jumys istep jatyr. Alaıda qazir qala turǵyndaryna tikeleı qaýip tónip turǵan joq. Qalanyń barlyq derlik aýmaǵy tazartylǵan. Negizgi jumystar jarylys bolǵan áskerı bólimniń aýmaǵynda júrgizilip jatyr. Jumys qaýipti, - dedi mınıstr.

Áskerılerden basqa bul mindetti eshkim oryndaı almaıdy. Bul úshin biliktiligi joǵary, daıyndalǵan kásibı mamandar qajet. Olar qıyn jaǵdaıda jumys istep jatyr. Olardyń ómirleri úshin qaýip-qater bar, - dedi Ermekbaev.  

Mınıstr qazaqstandyqtardy áskerılerge moraldyq turǵydan qoldaý kórsetýge shaqyrdy.