«Muzbalaq» anımasııalyq fılmi Germanııadan júldemen oraldy

"Muzbalaq" anımasııalyq fılmi ústimizdegi jyly qazannyń 7-i men 13-i aralyǵynda Germanııanyń Hemnıs qalasynda ótken 24-shi Halyqaralyq balalar men jasóspirimderge arnalǵan Schlingel kınofestıvalinde  Germanııanyń anımasııalyq fılmder ınstıtýty (DIAF) taǵaıyndaǵan  «Úzdik anımasııalyq fılm» júldesimen marapattaldy dep habarlaıdy Qamshy.kz aqparat agenttigi Qazaqfılm resmı saıtyna silteme jasap.

Qazaqtyń ǵasyrlar boıy qalyptasqan saıatshylyq mádenıeti týraly syr shertetin «Muzbalaq» anımasııalyq fılmi búrkit pen adamnyń dostyǵy týraly baıandaıdy. Fılmdi QR Mádenıet jáne sport mınıstrligi tapsyrysy boıynsha Sh.Aımanov atyndaǵy «Qazaqfılm» AQ túsirgen. Rejısserleri –Turdybek Maıdan jáne Tilek Tóleýǵazy.

«2D  anımasııasynyń  tań qaldyrarlyq úlgisi. Disney jáne Pixar anımasııalyq keńistiginen tys jerde jasalǵan naǵyz jańalyq», delingen festıvaldiń baspasóz baıanynda.

Schlingel halyqaralyq festıvalin Germanııanyń balalar men jasóspirimder jónindegi Sakson qyzmeti uıymdastyrǵan. Bıyl bul baıqaýda 52 elden kelgen 233 balalar men jasóspirimderge arnalǵan fılmder kórsetildi.

- Kóz maıyn taýysyp jasaǵan týyndymyz Eýropadaǵy iri festıvalde úzdik dep tanylyp jatqanyna qýanyshtymyz. Bul fılm ulttyq boıaýy qanyq, qazaqtyń bolmysyn kórsetetin týyndy, sondyqtan da sheteldikterge qyzyqty boldy dep oılaımyn. Osy oraıda, bizge qoldaý kórsetip, osy fılmniń shyǵýyna sebepker bolǵan Mádenıet jáne sport mınıstrligine, «Qazaqfılm» kınostýdııasyna alǵysymyzdy bildiremiz. Osyndaı jeńister kóp bolyp, «Muzbalaq» barshamyzdy qýanta bersin, - dedi fılmniń rejısseri Turdybek Maıdan.

Esterińizge sala ketsek, byltyr «Muzbalaq» fılmi Qazaqstannyń kınematografıster odaǵy taǵaıyndaǵan «Qulager» syılyǵy – «Úzdik anımasııalyq fılm» júldesimen  marapattalǵan. Sonymen qatar, anımasııalyq týyndy Reseıde ótken XVII Halyqaralyq «Alaý rýhy» («Dýh ognıa») atty debıýttik fılmder kınofestıvaliniń jasóspirimder men balalarǵa arnalǵan baıqaýyna jáne  Chehııanyń Zlın qalasynda ótken 59-shy balalar men jasóspirimderge arnalǵan «Panorama» festıvaliniń konkýrstan tys baǵdarlamasyna  qatysty. Odan bólek, bul fılm Reseıde ótken 14 Halyqaralyq «Otbasymen birge» festıvalinde arnaıy júldege qol jetkizdi.