Áskerı-patrıottyq jarys ótti

ShQO Shúlbi kentinde "Jastar jylyna" oraı "Ulan" áskerı-patrıottyq jáne azamattyq tárbıe berý ortalyǵynyń bazasynda Shyǵys Qazaqstan oblysy ákiminiń júldesine arnalǵan "Aibyn" VI oblystyq áskerı-patrıottyq jastar jıyny ótti.

Jıynǵa Shyǵys Qazaqstannyń qalalary men aýdandarynan jınalǵan on áskerı-patrıottyq top qatysty. Barlyq qatysýshylar-qalalyq jáne aýdandyq kezeńderdiń jeńimpazdary.

Eki kún boıy qatysýshylar saptyq daıyndyq, fızıkalyq normatıvterdi tapsyrý, avtomat qurastyrý men bólshekteý, áskerılendirilgen kross syndy jarystarǵa qatysyp, "Aıbyn daýysy" vokaldyq festıvalinde ónerlerin kórsetti. Jıyn aıasynda "IQazaqstan" zııatkerlik oıyny men robototehnıkadan "Meniń robotym"  atty saıys ótkizildi.

– Áskerı-patrıottyq jıyn "Jastar jyly" aıasynda ótkizilýde. Basty maqsat – salaýatty ómir saltyn nasıhattaý, jastarǵa áskerı-sporttyq jáne tehnıkalyq daıyndyqty úıretý, – dedi ShQO ishki saıasat basqarmasy basshysynyń orynbasary Rıshat Ramazanov. – Osyndaı is-sharalardy ótkize otyryp, biz bolashaq Otan qorǵaýshylarymyzdy tárbıeleımiz. Ár komanda jeńiske laıyq, óıtkeni jıynǵa Shyǵys Qazaqstan oblysynyń myqty toptary qatysýda.

Jarys qorytyndysy boıynsha bas júldeni Semeı qalasynyń "Jas qyran" áskerı-patrıottyq klýby, birinshi oryndy Jarma aýdanynyń "Jas saqshy" komandasy, ekinshi oryndy Zaısan aýdanynyń "Aıbyn" komandasy jeńip alsa, al úshinshi oryndy О́skemen qalasynyń "Jas búrkit"komandasy ıelendi.

Endi jeńimpazdardyń "Aıbyn" respýblıkalyq áskerı-patrıottyq oıyndaryna daıyndyǵy bastalady.

Esterińizge sala keteıik, bıylǵy jyly Qaraǵandy oblysynda ótken "Aıbyn" respýblıkalyq jıynynyń jeńimpazdary Semeıden barǵan top edi.

Semeı qalasynyń aqparattyq ortalyǵy