• USD 389.52
  • EUR 429.21
  • RUB 6.07
  • CNY 54.94
21 Qarasha, 00:10:33
Qazaqstan Ýkraınanyń saýda naryǵyna alańdaýly

11 Qazan, 2019 Aımaqtar

TarMÝ-da talapty jastar kóp

Elbasy Nursultan Ábishuly Nazarbaevtyń usynysymen jarııalanǵan Jastar jylynda Jambyl oblysynda da júıeli jumystar atqarylýda. Ásirese, arnaýly orta jáne joǵary oqý oryndary tarapynan da tııanaqty tirlikter tiktelýde. Solardyń qatarynda M.H.Dýlatı atyndaǵy Taraz Memlekettik ýnıversıteti de egemen elimizdiń erteńi sanalatyn jastardyń jarqyn bolashaǵy úshin aıanyp jatqan joq.

Búginde atalmysh oqý ordasy stýdentterdi bilim nárimen sýsyndatyp qana qoımaı, kásipkerlik negizderine beıimdeýge de basymdyq berýde. Osy oraıda ýnıversıtet qabyrǵasynda 2003 jyldan beri jumys jasap kele jatqan Enactus Dulaty komandasynyń bastamalary quptaýǵa turarlyq.

Aıta ketý kerek, bastapqyda uıym SIFE (stýdentter erkin kásipkerlikte) dep atalǵan. Keıin uıymnyń aýqymy keńeıe túsken. Jetekshisi – Ámına Nasıbýlına. Onyń aıtýynsha Enactus Dulaty komandasyna múshe bola otyryp, stýdent jas óz mamandyǵymen qosa, kásipkerliktiń qyr-syryn meńgeredi, álemdi tanıdy, kózqarasy ózgerip, umtylysy artady. О́zgege kómektese otyryp, qoǵamdy damytady.

– Komandanyń belsendi jastary muqtaj adamdardyń ómir súrý sapasy men deńgeıin jaqsartý úshin kásipkerlik ádisti paıdalanady. Oqytýshy men bıznes-kóshbasshynyń qoldaýyna súıene otyryp, Enactus stýdentteri barlyq álemde jobalar jasap, olardy iske asyrady. Jobalardy iske asyrý barysynda alynǵan tájirıbe ómirdi ózgertip qana qoımaı, sonymen qatar stýdentterge naǵyz kóshbasshy bolýǵa kómektesedi. Elimizde 50-den asa JOO men kolledjderinde Enactus komandalary bar. Sáýir aıynda ótken respýblıkalyq jarystan bizdiń ýnıversıtettiń komandasy chempıon atanyp, AQSh-tyń San-Hose qalasynda ótetin álemdik chempıonatqa qatysýǵa múmkindik aldy. Enactus Dulaty komandasyna ár túrli mamandyqtyń stýdentteri múshe. Olar san qyrly. Osy stýdentter ekonomıkalyq, ekologııalyq, áleýmettik máselelerdi kóterip, jobalarmen jumys isteıdi,-deıdi Ámına Ýálıqyzy.

Búginde komanda jastary Taraz qalasyndaǵy Kóltaǵan aýmaǵynyń problemasyn qamtı otyryp, halyqtyń turmysyn jaqsartýda úsh jobany júzege asyrǵan. Ondaǵy basty másele – aýylda gaz joq, áıelder arasynda jumyssyzdyq deńgeıi joǵary. Mine, osy máselelerdi sheshý úshin olar aýyl adamdaryna sharýashylyqty júrgizýdiń tıimdi joldaryn kórsetti. Máselen, jyl aıyn jerge pııaz ege bergen soń, jerdiń qunarsyzdyǵy baıqalǵan. Mundaı kezde bir jyl burshaq ekse jer qaıta qunarlanyp, ónimdi eki ese kóp beredi. Aýyl adamdary osylaı etti de. Bir jyl burshaq, keleside pııaz egip, eki ese ónimge qol jetkizgen. Ekinshi joba, gazdyń joqtyǵyna, otyn máselesine qatysty. Al kómirdiń tonnasy 20 myń teńge shamasynda turady. Kómir jetpegendikten jergilikti halyq balondaǵy gazdy qoldanýǵa májbúr. Balon jarylyp, qaıǵyly jaǵdaı oryn alǵan oqıǵalar da bolyp jatyr. Komanda jastary kómir, karton jáne tezekti biriktirý arqyly otyn oılap tapty. Ol turmystyq qaldyqtardan jasalǵandyqtan, kómirdiń baǵasynan áldeqaıda arzan túsedi. Jáne jergilikti halyqty otyndy jasaıtyn qurylǵynyń jumysymen tanystyryp, tásilin úıretti.

Al, úshinshi joba, jumyssyzdyqpen kúresýge qatysty. Aýyldyń qyz-kelinshekterine jumsaq oıynshyqtar jasaýdy, qol-óner buıymdarynyń túr-túrin tigýdi úıretip, ony naryqqa shyǵarýdyń joldary kórsetildi. Qalaı bıznes-jospar ázirleýdi, áleýmettik jelilerde paraqsha ashý arqyly isti qalaı alǵa jyljytýǵa bolatyny aıtyldy.

Qýantarlyǵy, Enactus baǵdarlamasy stýdentterge bıznes pen ekonomıkanyń máselesin tolyq túsiný úshin jan-jaqty bilim, daǵdy men tájirıbe beredi. Bul baǵdarlama ýnıversıtet bilimine qosymsha bilim bolyp tabylady, óıtkeni is júzinde teorııalyq bilimdi qoldanýǵa jáne praktıkalyq tájirıbe alýǵa múmkindik mol.

Qate tapsańyz, qajetti bólikti tańdap ctrl+enter basyńyz.

Banner

Pikir qaldyrý

pikir