Dosaev kimderge kredıt berilmeıtinin aıtty

Jyl sońyna deıin kirisi tómen azamattarǵa kepilsiz qaryz berýge tyıym salatyn sharalar qabyldanady. Bul týraly búgin ulttyq banktiń tóraǵasy Erbolat Dosaev málimdedi, 

Dosaev halyqtyń borysh júktemesiniń ósýine oraı júıeli táýekelderdi shekteý úshin shilde aıynda tutynýshylyq kredıtterdiń sýbektilerin retteıtin zań qabyldanǵanyn atap ótti.

"Jyl sońyna deıin 90 kúnnen asyp ketken bereshegi bar kepilsiz tutynýshylyq qaryzdar boıynsha turaqsyzdyq somasyn, komısııany, ózge de tólemderdi esepteýge, kirisi kúnkóris deńgeıinen tómen azamattarǵa qaryz berýge tyıym salýdy kózdeıtin sharalar qabyldanady", – dedi Dosaev úkimet otyrysynda.

Budan bólek, kepilsiz tutynýshylyq qaryzdy kirisi tómen azamattarǵa bermeýge baǵyttalǵan retteý sharalary da qolǵa alynbaq.

Osy jyldyń maýsymynda memleket basshysy úkimet pen ulttyq bankke tabysy kúnkóris deńgeıinen tómen azamattarǵa qaryz berýge tyıym salýdy tapsyrǵan edi.

Bıyl Qazaqstanda eń tómengi kúnkóris deńgeıiniń mólsheri 29 698 teńge boldy.