• USD 468.56

  • EUR 497.56

  • RUB 7.3

  • CNY 67.18

19 Naýryz, 15:50:08
Almaty
+35°

Jyr jampozy, qazaq poezııasynyń jaryq juldyzy Ilııas Jansúgirovtiń 125 jyldyq mereıtoıyna oraı týǵan jeri Almaty oblysynyń Jansúgirov kentinde aqynnyń 5 metrlik eńseli eskertkishi ornatyldy dep habarlaıdy Qamshy.kz aqparat agenttigi Almaty oblysy ákiminiń baspasóz qyzmetine silteme jasap. 

Dúbirli toıdyń betashary bolǵan saltanatty sharaǵa oblys ákimi Amandyq Batalov, Olımpıada chempıony, Qazaqstannyń Eńbek Eri, mesenat Jaqsylyq Úshkempirov, QR eńbek sińirgen qaıratkeri, tanymal jýrnalıst Nurtileý Imanǵalıuly, Qazaqstan Jazýshylar odaǵy tóraǵasynyń birinshi orynbasary Aqberen Elgezek jáne birqatar qoǵam qaıratkerleri, aqyn-jazýshylar, aýdan halqy qatysty. Eskertkishtiń shymyldyǵy túsirilip, aqynǵa taǵzym sharalary atqarylǵannan keıin sóz alǵan oblys ákimi Amandyq Batalov dúbirli toıdyń bastalýymen barsha qaýymdy quttyqtady. "Búgin týǵan jeriniń tórinen Ilııas aqynǵa arnalyp eńseli eskertkishi ornatylyp otyr. Bul - eliniń tarlan talantqa degen qurmeti, eren erge degen taǵzymy dep bilemiz. Aqyn shyǵarmalarynan Qulagerdiń dúbiri, dalanyń jyry, qobyzdyń úni, dombyranyń kúmbiri esip turady. Osy danalyq izi, ulylyq bıigi - urpaqtyń oıyna qýat, boıyna nár beretin baǵa jetpes baılyq. Bul oraıda Elbasynyń "Rýhanı jańǵyrý" baǵdarlamasy áleýmettik-mádenı salalardyń tyń serpinmen damýyna erekshe yqpal etip otyr. Mesenattardyń ekonomıkanyń basqa salalarymen qatar, mádenıetke qoldaý kórsetýi rýhanııatqa qyzmet etkeni dep túsinemiz. Ásirese, kásipker azamattar baǵdarlamany júzege asyrýǵa, týǵan jerin kórkeıtýge belsene atsalysyp keledi. Búgingi shara - sonyń aıqyn kórinisi", - dedi Amandyq Batalov.

Ilııas jansúgirov eskertkishi
Sondaı-aq, oblys ákimi osyndaı ıgi istiń atqarylýyna muryndyq bolǵan mesenat pen músinshiniń eńbegin erekshe atap ótti.  Munan soń sóz alǵan ardager jýrnalıst Nurtileý Imanǵalıuly qazaqtyń mańdaıyna bitken úsh arysynyń - Sáken, Ilııas, Beıimbettiń bólinbeıtin úsh tuǵyr ekendigin eske sala otyryp, bul mereıtoıdyń ilııastaný salasyna tyń serpin, jańa bir tynysyn ashyp bergenin aıtty. Aqynnyń 20 tomdyǵyn shyǵarý, "Ilııas izimen" ekspedısııa quryp, Máskeýge saparyn uıymdastyrý sharalaryna qoldaý kórsetken, mereıtoıdyń keń kólemde, joǵary deńgeıde ótýine muryndyq bolǵan oblys basshylyǵyna kóptiń atynan rızashylyǵyn jetkizdi. Sonymen qatar tól perzentimizdiń toıy dep bar yqylas-peıilderin tanytqan aqsýlyqtarǵa da shyn kóńilden alǵys aıtty. Sondaı-aq aqynnyń toıy budan ári Taldyqorǵanda, Almaty men Nur-Sultan qalalarynda jáne TÚRKSOI uıymynyń qoldaýymen Túrkııada ótetinin qýanyshpen jetkizdi. 

Ilııas jansúgirov
Eskertkish aldynda aqyn toıyna joldaǵan Memlekettik hatshy Qyrymbek Kósherbaev pen Almaty qalasy ákiminiń orynbasary Erjan Babaqumarovtyń quttyqtaý telegrammalary oqyldy.  Qazaqstan Jazýshylar odaǵy Basqarma tóraǵasynyń orynbasary Baýyrjan Jaqyp búgin alash arysynyń tuǵyryna qaıta qonǵan tarıhı kúni ekenin aıta kelip, aqynǵa óleń arnady. Al jetisýlyq ardager, Almaty oblysynyń Qurmetti azamaty, qarymdy qaıratker Naýryz Qylyshbaev aqynnyń "Jetermiz be tilekke" atty óleńin taǵdyrymen ushtastyra otyryp oqyp, murasynyń máńgilik ekenin atap ótti.  Osy jıynǵa Qyzyljar ólkesinen arnaıy kelgen Beıimbet Maılınniń nemeresi Dámen Ábilqasymqyzy da sóz alyp, kezek-kezegimen tutqyndalyp ketken úsh arystyń artynda qalǵan jubaılarynyń bir-biriniń balalaryna qalaı qamqorlyq tanytqany, qıyn sátterde bir-birine súıeý, demeý bola bilgeni týraly áserli estelikterimen bólisti. "Sáken, Beıimbet, Ilııas atalarymyzdyń toıy - barsha qazaqtyń ortaq toıy", - dedi D.Ábilqasymqyzy. Atap ótsek, Jansúgirov kentiniń ortalyq alańyna qoıylǵan eńseli eskertkishtiń avtory - Qazaqstan Sáýletshiler odaǵynyń múshesi, Mádenıet salasynyń úzdigi, músinshi Qazbek Dýlatov. Eskertkishtiń daıyndalýyna qarjylyq qoldaý kórsetken mesenat - Moldııar Nurbaev.

Ilııas jansúgirov
Budan ári toı Jansúgirov kentindegi ortalyq stadıonda teatrlandyrylǵan sharamen jalǵasty. Osy ortada kópshilikke jyly lebizin bildirgen oblys ákimi Amandyq Batalov oblystaǵy rýhanııat salasynda, tarıhty taný baǵytynda atqarylyp jatqan sharalarǵa qysqasha toqtalyp ótti. Kúni keshe Qarasaı batyrǵa eńseli eskertkish qoıylsa, búgin Ilııas aqynnyń aty ardaqtalyp, granıtten quıylǵan músininiń tuǵyrǵa qonǵanyn tilge tıek etti. Aqsý óńirindegi ekonomıkalyq, rýhanı ilgerileýshilikterdi bılik pen halyq árdaıym birlesip atqaryp otyrǵanyn da aıtty. Aldaǵy ýaqytta da eldiń berekesimen, kóptiń kómegimen budan da aýqymdy ister atqarylatyndyǵyna senim bildirdi. Osy sahnada ilııastanýshy ǵalymdar Muratbek Imanǵazınov pen Kámılá Qoqymovanyń aqynnyń ómiri men shyǵarmashylyǵyna qatysty arhıv derekteri boıynsha daıyndalǵan zertteý kitaptarynyń tusaýy kesildi. Mereıtoı aıasynda aqynnyń "Qulager" shyǵarmasy belgili rejısser, QR eńbek sińirgen qaıratkeri, professor Sáýlebek Asylhanulynyń ssenarıimen daıyndalyp, rejısserligimen sahnalandy. Basty rólderdi Beıbit Qarmanov, Asqar Muqııat, Maıra Omarova syndy belgili akterlar somdap, jergilikti óner ujymdary atsalysty, bir tynyspen, keremet úılesimmen qoıylǵan kórinis stadıon toly kórermenderdiń kóńilin erekshe áserge bóledi. Osy kúni sportsúıer jastar kókpardyń kórigin qyzdyrdy. Aqynnyń arýaǵyna arnap as berildi. "Dala dastany" spektakli qoıyldy.  

ilııas jansúgirov
Eske salsaq, mereıtoılyq sharalar erteń Taldyqorǵanda jalǵasyp, toı qonaqtary mýzeı, kitap, sýret kórmelerin tamashalaıdy, aqyn shyǵarmalarynyń 20 tomdyǵynyń tusaýy kesilip, respýblıkalyq ǵylymı-tájirıbelik konferensııa ótedi. Respýblıkalyq jazba aqyndar músháırasynyń jeńimpazdary marapattalyp, "Taldyqorǵan" ıppodromynda ulttyq at sporty túrlerinen jarystar uıymdastyrylyp, I. Jansúgirov Mádenıet saraıynda merekelik konsert bolady.

"Qamshy" silteıdi

Qate tapsańyz, qajetti bólikti tańdap ctrl+enter basyńyz.

Pikir qaldyrý

pikir