Atyraýdyń dárigerleri mas kúıinde ota jasap, elýge jýyq sábı shetinegen

Atyraý oblystyq sybaılas jemqorlyqqa qarsy agenttik ókilderiniń  statıstıkasyna súıensek, Atyraý oblystyq perınataldyq ortalyǵynda sońǵy eki aıda elýge jýyq shaqalaq shetinep ketkendigi belgili boldy. Osyǵan baılanysty bala ólimi órship turǵan ortalyqtyń bosaný bólimshesi ýaqytsha jabylatyndyǵyn Atyraý oblystyq sybaılas jemqorlyqqa qarsy is-qımyl departamentiniń basshysy málimdedi.

«Perınataldyq ortalyqtyń jeldetkish júıesi sońǵy bir jarym jyldan beri jumys istemegen. Sonyń saldarynan aýada shań men ınfeksııa jınalǵan. Aqyldasa kele, osy jaǵdaılar oryn alǵan bosandyrý bólimshesin ýaqytsha jabý týraly kelisimge keldik. Bul perınataldyq ortalyq túgel jabylady degen sóz emes”, – dedi Atyraý oblystyq sybaılas jemqorlyqqa qarsy is-qımyl departamentiniń bastyǵy Nyǵmedjan Saparov.

Aty shýly perzenthanadaǵy tósek japqysh pen jaıalyqtar arnaıy orynda emes, aýlada jýylyp keptirilgen. Qazir mamandar ol jerden synama alyp tekserýge kiristi. Eń soraqysy, dárigerlerdiń mas kúıinde ota jasap, sábılerge zaqym keltirgeni anyqtalǵan. Osy jaıttardyń bári bala men ana óliminiń kóbeıýine áser etkeni belgili boldy.

Sebebi, bıyl 45 myń sábı dúnıege kelse, onyń 442-si óli týǵan. 432-si jaryq dúnıeni kóre salyp shetinegen. Al bul bylyqtardyń áshkerelenýine sebepker bolǵan sábı qazasyna qatysty derekti jemqorlyqpen kúreskerler oıda joqta anyqtaǵan. Jemqorlyqqa qatysty kúdikke ilingen Qýanysh Nysanbaevtyń telefonyn tyńdaý kezinde, balanyń kózin joıý týraly buıryǵyn estıdi.

«Biz áńgimeni estigen boıda sábıdi qutqaryp qalý úshin shuǵyl jettik, biraq úlgermedik. Perınataldyq ortalyq qyzmetkerleri uzaq ýaqyt boıy esikti ashpady. Al Qýanysh Nysanbaevty saǵattap izdep, qaladaǵy saýnalardyń birinen ustadyq. Tergeý jumystarynan keıin sábılerdiń jappaı óliminiń naqty sebebi belgili bolady dep otyrmyz”, – dedi Atyraý oblystyq sybaılas jemqorlyqqa qarsy is-qımyl departamentiniń basshysy N.Saparov.