AQSh-Qytaı saýda soǵysy: álem ekonomıkasyna tóngen resessııa qaýpi  

Amerıka saýda mınıstrliginiń málimdeýinshe, Qytaı vıse-premeri Lıý He beısenbi kúni Vashıngtonǵa saýda kelissózderin júrgizýge barady. Ol bastaıtyn delegasııa quramyna saýda mınıstri, ortalyq bank jetekshisi, ındýstrııa, tehnologııa, aýylsharýashylyǵy mınıstrlikteriniń ókilderi kiredi dep habarlaıdy Qamshy.kz aqparat agenttigi inbusiness.kz deregine súıenip. 

Kelissózder qarsańynda eki derjava bir-birimen tatýlasýǵa da umtylysyn baıqatyp, jazalaýshy tarıfterdi alyp tastaýǵa nemese keıinge qaldyrýǵa nıet tanytyp otyr. Alaıda taraptardyń Qytaıdyń saýdalyq jáne tehnologııalyq ambısııalaryna qatysty ózekti máseleler boıynsha bir sheshimge kelýi ekitalaı.

Qytaı memlekettiń kómegi arqasynda robottyq jáne basqa da tehnologııalar jasaýdan ǵalamdyq básekede kósh bastap barady. Sol úshin AQSh oǵan qarsy qysymdy kúsheıtti degen boljam bar. Beıjiń bolsa, buǵan qarsylyq kórsetip otyr. AQSh, Eýropa, Japonııa sııaqty elder osy jaǵdaı úshin Qytaıdy ashyq naryq mindettemelerin oryndamaı otyr dep kinálap keledi.

Al, keıbir amerıkalyq resmı ókilderdiń pikirinshe, ádiletsiz báseke Qurama Shtattardyń ındýstrııaldyq lıderligin toqtatýy múmkin. Eki memleket bir-biriniń mıllıardtaǵan dollarlyq taýarlaryna salyqty kóterdi.  Sonymen qatar AQSh-Qytaı saýda soǵysy álem ekonomıkasyn resessııaǵa uryndyrady degen qaýip kúsheıip keledi.

Arys Ádilbekuly