Memleketke opasyzdyq jasaǵan qytaıtanýshy ǵalym 10 jylǵa sottalyp ketti

Qazaqstandyq ǵalym Konstantın Syroejkın sot sheshimimen 10 jylǵa sottaldy dep habarlaıdy Qamshy.kz aqparat agenttigi Ulttyq qaýipsizdik komıtetiniń baspasóz qyzmetine silteme jasap.

Almaty qalasynyń mamandandyrylǵan aýdanaralyq qylmystyq ister boıynsha soty Konstantın Syroejkındi qylmystyq kodekstiń 175-babynyń 1-bólimi "Memleketke opasyzdyq jasaý" boıynsha kináli dep tanyp, 10 jylǵa sottady.

Ulttyq qaýipsizdik komıteti baspasóz qyzmetiniń habarlaýynsha, sot úkimi 2019 jyldyń 7 qazanynda shyqqan. Konstatın Syroejkın – Qazaqstan azamaty.

Konstatın Syroejkın degen kim?

Qazaqstan prezıdenti janyndaǵy Qazaqstan strategııalyq zertteýler ınstıtýtynyń saıtynda 62 jastaǵy Syroejkın 2006 jyldyń basynan beri bas ǵylymı qyzmetker bolyp jumys isteıtini habarlanǵan.

Mamyr aıynyń basynda BAQ-ta qazaqstandyq arnaıy qyzmetter Syroejkındi, aldyn ala boljam boıynsha, tyńshylyq jasady degen aıyppen ustaǵany týraly aqparat jarııalandy.

Keıinirek qazaqstandyq ǵalymdar bılikten Syroejkınge qatysty jaǵdaıdy túsindirýdi jáne eger bul aqparat rastalsa, tergeý barysyn jeke baqylaýǵa alýdy surady.

2019 jyldyń 15 qańtarynda Ulttyq qaýipsizdik komıteti Syroejkınge qatysty qylmystyq kodekstiń 175-babynyń 1-bóligi "Memleketke opasyzdyq jasaý" boıynsha qylmystyq is qozǵady.

Syroejkın – qytaıtanýshy ǵalym, kóptegen kitaptyń, sondaı-aq orys, aǵylshyn jáne qytaı tilderindegi myńnan asa maqalanyń avtory.

Ashyq derekkózderge súıensek, ol Qazaqstan saıası ǵylymdar akademııasynyń akademıgi, tarıhı ǵylymdar kandıdaty jáne saıası ǵylymdar doktory, sondaı-aq Sınszıan ýnıversıtetiniń qurmetti professory.