Qazaq-qytaı jumysshylarynyń tóbelesi: Ustalǵandardyń týystary sotqa kirgizbegenin aıtty

Almaty oblysy Aqsý aýdanynda jol salyp jatqan Qytaı men Qazaqstan jumysshylary arasynda bolǵan tóbeleske baılanysty ustalǵan kúdiktilerdiń týystary "Kimnen kómek surarymyzdy bilmeı otyrmyz" deıdi. Bul týraly Aqsý aýdany Qyzylaǵash aýylynyń turǵyny, sol oqıǵaǵa qatysy bar dep ustalǵan Beıbit jáne Nurbol Muhametalınniń aǵasy Erbol Muhametalın Qamshy tilshisine aıtyp berdi. 

Muhametalınnyń aıtýynsha, polısııa qylmystyq kodekstiń "Buzaqylyq" baby boıynsha ustalǵan inilerine qatysty  málimet bermeı otyr. 

– Bizge eshqandaı málimet bergen joq. Olar qamaýda otyrǵan polısııa bólimshesine de kirgizbeı qoıdy. Búgin Taldyqorǵanda sot bolady deıdi. Qalaı sottaıyn dep jatyr, ol jaǵyn aıtpady. Kimnen kómek surarymyzdy bilmeı otyrmyz, – deıdi ol.

Muhametalın eki inisiniń "Citic Construction" kompanııasyna (qazaq-qytaı jumysshylary arasynda tóbeles bolǵan komanpanııa) eshqandaı qatysy joq ekenin aıtady. Onyń aıtýynsha, eki inisi resmı túrde eshqaıda jumys istemeıdi, úıde mal sharýashylyǵymen aınalysady. 

– Meniń eki inim ol kompanııada jumys istemeıdi, Qyzylaǵashta mal sharýashylyǵymen aınalysady. Ekeýiniń de bala-shaǵasy bar. Beıbittiń jasy 32-de, al Nurbol 29 jasta. Olar Qytaı jumysshylarynyń qazaq jigitti jabylyp urǵany namystaryna tıip, sol kompanııada jumys isteıtin bizdiń aýyldyń jigitterimen birge qytaılar jumys istep jatqan jaqqa barǵan. Qytaılar men qazaqtar arasynda tóbeles bolǵan. Meniń eki inim - Beıbit pen Nurboldy jáne olardan bólek bizdiń aýyldyń (Qyzylaǵash-red) úsh jigitin polısııa ustaǵan, – deıdi Erbol Muhametalın. 

Al osy oqıǵaǵa baılanysty kúdikke ilingen Berikbol Rysaldınovtyń baýyry Amangeldi Rysaldınov Taldyqorǵan qalasynda  osy oqıǵaǵa baılanysty ustalǵan Qyzylaǵash aýylynyń bes azamatyna qatysty sot bastalǵanyn, biraq sot zalyna olardyń týystaryn kirgizbeı qoıǵanyn aıtady. Onyń aıtýynsha, quzyrly organ ókilderi sot zalyna "týystarynyń ne sebepti kirýge bolmaıtynyn" túsindirmegen. 

7 qazanda Almaty oblysy Aqsý aýdanynda jol salyp jatqan "Citic Construction" kompanııasyndaǵy Qytaıdyń tórt jumysshysy arasynda janjal bastalyp, keıin tóbeleske ulasqan. Tóbelesten Qazaqstanda turaqty turýǵa ruqsaty bar Qytaı azamaty, etnıkalyq qazaq jaraqattanǵan.  Kelesi kúni jergilikti turǵyndar men "Citic Construction" kompanııasynda jumys isteıtin Qazaqstan azamattary Qytaıdan kelgen jumysshylardy uryp-soqqan".  Polısııa "Buzaqylyq" baby boıynsha tergeý bastalǵanyn aıtqan bolatyn. 

Budan bólek, tekseris kezinde "Citic Construction" kompanııasynda sheteldiń 33 jumysshysy zańsyz jumys istep júrgeni anyqtalǵan. Polısııa qazir olardy Qazaqstannan deportasııalaýmen aınalysyp jatqanyn málimdedi.